Трамп назваў першыя 100 дзён ва ўладзе «самымі паспяховымі ў гісторыі краіны»
- 30.04.2017, 21:29
- 9,941
Дональд Трамп падрахаваў вынікі першых ста дзён свайго прэзідэнцтва.
Прэзідэнт ЗША Дональд Трамп заявіў, што ўважае свае першыя сто дзён ва ўладзе за «самыя паспяховыя ў гісторыі краіны». Такую заяву амэрыканскі прэзідэнт зрабіў у сваім штотыднёвым звароце ў суботу, 29 красавіка, адзначаючы ў гэты дзень свае першыя сто дзён прэзідэнцтва, паведамляе РБК.
«Я шчыра веру, што першыя сто дзён маёй адміністрацыі былі самымі паспяховымі ў гісторыі нашай краіны», — падае словы Трампа тэлеканал Fox News. «Самае галоўнае тое, што мы вяртаем працоўныя месцы», — сказаў ён.
29 красавіка Трамп правёў у штаце Пэнсільванія. У Гарысбэргу, сталіцы штата, у Трампа прайшоў мітынг ягоных прыхільнікаў. Пачатак сваёй прамовы перад прысутнымі Трамп прысвяціў крытыцы амэрыканскіх СМІ, зноў назваўшы іх «хлуслівымі».
Trump: "We have ended the war on beautiful clean coal, and we are putting our great coal miners back to work" https://t.co/ptuWNTKy9e
— CNN Breaking News (@cnnbrk) 30 апреля 2017 г.
«Вялікая група галівудскіх актораў і вашынгтонскія СМІ суцяшаюць адзін аднаго ў зале гатэля ў сталіцы нашай краіны проста зараз», — сказаў Трамп. «Яны сабраліся разам для штогадовай вячэры Асацыяцыі карэспандэнтаў Белага дома. Без прэзідэнта. А я настолькі шчаслівы, знаходзячыся больш чым за сто міль ад вашынгтонскага балота, бавячы свой вечар з усімі вамі, з значна больш шматлікімі і цудоўнымі людзьмі», — сказаў ён.
Пачатак мітынгу супаў з пачаткам штогадовай вячэры Асацыяцыі карэспандэнтаў Белага дома (WHCA) — штогадовай урачыстай імпрэзы высокага ўзроўню, на якой традыцыйна прысутныя знакамітасці, палітыкі і журналісты. Трамп яшчэ ў лютым паведаміў, што не пойдзе на гэтую дзею.
У сваёй прамове на мітынгу ў Пэнсільваніі, якая доўжылася амаль гадзіну, Трамп заявіў, што ягоныя першыя сто дзён знаходжання ва ўладзе «былі вельмі хвалявальнымі і прадукцыйнымі». У сваёй прамове ён таксама закрануў пытанні міграцыі, гандлю, працоўных месцаў ды шэраг іншых.
Не абышоў Трамп і тэму будаўніцтва муру на мяжы з Мэксікай. «Нам патрэбны мур. Мы пабудуем мур гэтак жа бясспрэчна, як вы зараз стаіце тут. Нам патрэбны мур», — запэўніў Трамп сабраных.
Trump: "We will build the wall as sure as you are standing there tonight. We need the wall" https://t.co/0EMwFf0nYG
— CNN Breaking News (@cnnbrk) 30 апреля 2017 г.
Кажучы пра замежную палітыку, Трамп запэўніў, што ўсе краіны NATO будуць уносіць свой фінансавы ўклад ва ўмацаванне бяспекі блока.
У мінулую пятніцу вынікі першых ста дзён прэзідэнцтва Трамп падрахаваў Белы дом, апублікаваўшы даведку «Сто дзён бяспекі і абароненасці прэзідэнта Трампа». Сярод заслуг прэзідэнта ў галіне нацыянальнай бяспекі Белы дом адзначыў «ізаляцыю Сірыі і Расеі ў ААН».