У Кішынёве затрымалі ўладальніка прэміі «хабар года»
2- 26.05.2017, 17:59
- 8,416
Мэра сталіцы Малдавіі затрымалі паводле абвінавачвання ў карупцыі.
Мэр Кішынёва Дорын Кіртаакэ затрыманы ў чацвер вечарам паводле абвінавачвання ў карупцыйных злачынствах. Адбылося гэта пасля шматгадзіннага ператрусу ў ягоным кабінеце: яго вывелі з будынка супрацоўнікі Нацыянальнага цэнтра ў барацьбе з карупцыяй (НЦБК), а затым прэс-сакратар НЦБК паведаміла аб выстаўленні мэру абвінавачванняў і магчымым тэрміне - да 10 гадоў пазбаўлення волі, піша newsru.com.
Калі Кіртаакэ вывелі, ён выглядаў спакойным. На пытанні журналістаў адказаў, што пакуль нічога каментаваць не будзе.
Як паведаміла прэс-сакратарка Нацыянальнага цэнтра барацьбы з карупцыяй Анжэла Старынская, мэра Кішынёва абвінавачваюць у карупцыі, злоўжыванні службовым становішчам, выманні выгады з ўплыву.
Следства мяркуе, што Кіртаакэ забяспечыў выйгрыш у тэндэры на абсталяванне парковак кампаніі Eme Parkleitsystem і разлічваў на 13% ад прыбытку фірмы. Яго затрымалі на 72 гадзіны.
Дорыну Кіртаакэ 38 гадоў. Ён узначальвае мэрыю Кішынёва трэці тэрмін запар, з 2007 года.
Крыху раней былі арыштаваныя і два віцэ-мэры, начальнік управы транспарту Кішынёва, а таксама міністр транспарту і дарожнай інфраструктуры.
Нагадаем, раней мэр Кішынёва «ўдастойваўся ганаровых званняў» «мурза года» і «хабар года».