«Балююць падчас чумы, а потым абіраюць людзей да ніткі»
8- 23.06.2017, 13:24
- 15,078
Жыхары Клічава абураныя «бясплатным» канцэртам ад райвыканкама.
На інтэрнэт-сайце Клічаўскага райвыканкама з'явілася аб’ява «Увага! 28 чэрвеня адбудзецца канцэрт з удзелам зорак беларускай эстрады!», паведамляе 6tv.by.
У аб'яве паведамляецца, што 28 чэрвеня 2017 года а 18.00 на стадыёне УА «Клічаўскі дзяржаўны аграрна-тэхнічны каледж» адбудзецца грандыёзны канцэрт фіналістаў Рэспубліканскага прафсаюзнага конкурсу Федэрацыі прафсаюзаў Беларусі «Новыя імёны Беларусі» з удзелам зорак беларускай эстрады.
Канцэрт пройдзе ў рамках рэспубліканскай народна-патрыятычнай акцыі «Мы - разам!», пра пачатак якой было абвешчана 22 траўня 2015 года на VII З'ездзе Федэрацыі прафсаюзаў Беларусі. Адзначаецца таксама, што канцэрт пройдзе ў Дзень горада і Дзень вызвалення Клічаўскага раёна ад нямецка-фашысцкіх захопнікаў.
Таксама паведамляецца, што для жыхароў горада будуць арганізаваныя разнастайныя выставы-продажы, прымеркаваныя да 425-годдзя першай згадкі пра Клічаў. Уваход на мерапрыемства вольны.
Жыхары Клічава адрэагавалі на аб'яву ў групе «Вячэрні Клічаў» у сацыяльнай сетцы «Вконтакте», чамусьці асабліва не ўзрадаваўшыся дармавому «фэсту» ад мясцовых чыноўнікаў:
«З удзелам зорак беларускай эстрады ў рамках рэспубліканскай народна-патрыятычнай акцыі», - зноўку акцыя, ізноў «патрыятычная». Не, не пайду тады.
«Для жыхароў таксама будуць арганізаваныя разнастайныя выставы-продажы» - хутчэй за ўсё выставы, продажу практычна не будзе....
«Запрашаем усіх ахвотных выдатна правесці вечар у кампаніі з добрай музыкай!» - ахвотныя будуць пад акцыяй «прымусова», вечары праводзяць выдатна, толькі з прыемнымі людзьмі і без прымусу»;
«...грошы няма куды падзець????? А потым будуць прасіць у людзей па нітцы. Гэта для нас нібыта бясплатна, яшчэ ніхто бясплатна не выступаў, усё будзе аплачана з бюджэтных грошай»;
«Пір падчас чумы. Грошай не даюць - якія выставы-продажы?»
І толькі адна з удзельніц групы напісала «дзякуй за навіну, хоць нармальны канцэрт можна будзе паглядзець, а то і схадзіць няма куды пацешыцца)», але і гэтае паведамленне таксама добра характарызуе становішча спраў з месцамі для культурнага адпачынку ў Клічаве...
Нагадаем, што літаральна некалькі дзён таму Клічаўскае КПК «Жылкамгас» размясціла на інтэрнэт-сайце мясцовага райвыканкама аб'яву, у якой заклікала грамадзян надаваць бязвыплатную (спонсарскую) дапамогу на правядзенне «Дажынак» і пералічваць грашовыя сродкі на дабрачынны рахунак свайго прадпрыемства.
Парадаксальная ўзнікае сітуацыя: грошай на падрыхтоўку да «Дажынак» не стае, а на правядзенне «грандыёзнага канцэрту» з удзелам зорак беларускай эстрады яны ёсць...