Аўтамабіль заехаў у натоўп людзей у ангельскім Ньюкасле
1- 25.06.2017, 16:06
- 19,704
Не менш як шэсць чалавек пацярпелі ў выніку наезду аўтамабіля на людзей у ангельскім Ньюкасле.
У сувязі з інцыдэнтам затрыманая 42-гадовая жанчына, яна знаходзіцца ў паліцыі, паведамляе расейская служба BBC.
Як паведамляецца, наезд адбыўся а 9:14 паводле мясцовага часу каля спартыўнага цэнтра Westgate.
У гэты час там праходзіла святкаванне мусульманскага свята Ураза-байрам.
У паліцыі адзначаюць, што інцыдэнт не звязаны з тэрарызмам.
«Як я разумею, [жанчына, якая наведала малітву] збіралася з'ехаць на сваёй машыне, і, думаю, яна не справілася з кіраваннем, - распавёў адзін з відавочцаў. - Я адразу пабег адтуль, таму што ўсе кінуліся да пацярпелых і спрабавалі напаіць іх вадой».
«Пачалася моцная паніка, усе крычалі, калі гэта адбылося, не лепшыя ўспаміны», - працягнуў сведка.
Са слоў прадстаўніка хуткай дапамогі, служба выратавання атрымала першы выклік а 9.15 па мясцовым часе (10.15 па Грынвічы), у якім паведамлялася аб наездзе аўтамабіля на тратуар. Медыкі даставілі ў бальніцу шасцярых чалавек.
Аповед відавочцы, доктара Афсара
«Я знаходзіўся на паркоўцы, калі пачуў крыкі, і пабег да будынка каледжа ў двух хвілінах ад мяне.
Там я ўбачыў вельмі маладога падлетка, які быў у крыві, яшчэ адзін падлетак, мяркуючы па ўсім, таксама быў паранены.
У мужчыны сярэдняга ўзросту былі раненні на твары, і ён быў у крыві.
Паліцыя ўжо была на месцы. Я бачыў іх, калі яны назіралі за малітвамі.
Паліцыянты змясцілі кіроўцу ў паліцэйскі фургон.
Я пагаварыў з людзьмі на месцы, яны распавялі, што яна выязджала з паркоўкі і раптам наехала на натоўп людзей.
Я і яшчэ некалькі іншых лекараў хацелі дапамагчы, але паліцэйскія і медыкі справіліся самі».