Палітвязень Сяргей Стрыбульскі выйшаў на волю
- 27.06.2017, 19:35
- 21,051
У следчым ізалятары КДБ і МУС застаюцца 13 патрыётаў.
Вечарам 26 чэрвеня выйшаў на волю адзін з патрыётаў Сяргей Стрыбульскі. Пра гэта tut.by паведамілі ў ПЦ «Вясна».
Са слоў праваабаронцаў, Стрыбульскаму змененая мера стрымання пад падпіску аб нявыездзе. Абвінавачанні са Стрыбульскага не знятыя, ён па-ранейшаму знаходзіцца ў статусе абвінавачанага паводле артыкула аб стварэнні незаконнага ўзброенага фармавання.
Нагадаем, у канцы траўня стала вядома, што былі падоўжаныя тэрміны следства і ўтрымання пад вартай Сяргею Стрыбульскаму і яшчэ палітвязням.
Усяго ў справе аб «масавых беспарадках» першапачаткова праходзілі 35 чалавек, з іх 20 абвінавачваліся яшчэ і паводле артыкула аб незаконным узброеным фармаванні (звесткі КДБ на 11 красавіка).
16 чэрвеня стала вядома, што справа аб масавых беспарадках была спыненая. СК прыняў да разгляду крымінальную справу ў дачыненні да шэрагу асоб, якія абвінавачваюцца ва ўчыненні злачынства паводле арт.287 Крымінальнага кодэкса (Стварэнне незаконнага ўзброенага фармавання).
Паводле апошніх звестак ад праваабаронцаў, у следчым ізалятары КДБ і МУС застаюцца 13 чалавек. Некаторым з іх следства прадоўжылі на 2-4 месяцы.