19-гадовы хакеіст нацыянальнай каманды Беларусі пяройдзе ў клуб КХЛ

Беларускі абаронца Павел Верабей уклаў кантракт з Браціслаўскім «Слованам».

Выхаванец «Юнацтва» Павел Верабей пачынаў мінулы сезон у камандзе U-20, якая выступае ў экстралізе. І, нягледзячы на амплуа, быў адным з найлепшых бамбардзіраў сярод партнёраў: 21 (7+14) бал у 23 матчах, паведамляе «Прессбол».

Пасля снежаньскага моладзевага чэмпіянату свету ў Нямеччыне, дзе хлопцы Юрыя Файкова вярнулі сабе прапіску ў эліце, Вараб'я запрасілі ў Маладзечанскае «Дынама». У фарм-клубе «зуброў» 19-гадовы хакеіст згуляў яшчэ ў 18 паядынках, адзначыўшыся дзвюма выніковымі перадачамі.

Таксама Паўла рэгулярна запрашалі ў нацыянальную каманду, і ў траўні Дэйв Льюіс узяў гульца на дарослы ЧС у Кёльне і Парыжы. Там, на прызнанне трэнера, на таленавітага хлопца звярнулі ўвагу ў тым ліку заакіянскія скаўты. Аднак будучы сезон абаронца наважыў правесці ў КХЛ. Цікавасць да яго выяўляў не толькі «Слован», але з прычыны нявызначанасці са статусам беларускіх хакеістаў расейскія клубы пакуль не маглі зрабіць канкрэтныя прапановы. У Браціславе ж легіянерскага ліміту няма. Менскае «Дынама» таксама вяло перамовы, праўда, бакі так і не знайшлі агульных поглядаў.

Новая каманда Вераб'я ў мінулым чэмпіянаце фінішавала на 10-м месцы ў канферэнцыі і адстала ад зоны плэй-оф на 8 балаў. Цяпер на кантракце ў «Слованам», акрамя беларуса, яшчэ пяць абаронцаў, у тым ліку экс-дынамавец Іван Шварн і легендарны славак з багатым досведам НХЛ Андрэй Месараш. Трэніруе «арлоў» Мілаш Ржыга.