«Не цэнзуры - не дыктатуры»: у Маскве заклікалі да рэвалюцыі

У Маскве тысячы чалавек выйшлі на марш «За вольны інтэрнэт».

У Маскве прайшла акцыя пратэсту з патрабаваннем скасаваць цэнзуру ў інтэрнэце, рэгабілітаваць тых, хто быў асуджаны за перадрук і ўпадабанні ў сацыяльных сетках, а таксама адправіць у адстаўку кіраўніка Роскомнадзора Аляксандра Жарава. Пра гэта паведамляе ria.ru.

Марш за вольны інтэрнэт прайшоў з 14.00 да 16.00. Было заяўлена пра дзесяць тысяч удзельнікаў.

Людзі скандавалі лозунгі і трымалі ў руках плакаты: «Рэвалюцыя», «Інтэрнэт не забараніць, лепш Думу распусціць», «Волю інтэрнэту», «Далоў вялікага брата», «Свабода слова ўсюды і заўсёды», «Забараняем забараняць», «Расея без Пуціна, інтэрнэт без буржуяў», «Не цэнзуры - не дыктатуры», «Інтэрнэт не пасадзіш, праграміст не тэрарыст», «Не Роскомнадзору» ды іншыя.

Былі затрыманыя двое актывістаў: адзін за плакат з надпісам Putin lies, а другі прыхільнік апазіцыянера Аляксея Навальнага, які спрабаваў пранесці праз рамкі металашукальніка агітацыйныя лісткі.