Жыхары раёна велазавода: Гэта куток пасляваеннага Менска, а вы хочаце пабудаваць шкельцы

Улады хочуць знесці амаль паўсотні невысокіх дамоў, яшчэ частку - перарабіць, а з раёна прыбраць ліцейныя цэхі прадпрыемства.

23 жніўня ў адміністрацыі Ленінскага раёна Менска прэзентавалі праект забудовы тэрыторыі паміж метро «Пралетарская» і велазаводам. Тыдзень таму людзей прыйшло так шмат, што яны не змясціліся ў актавай зале школы №40, і сустрэчу перанеслі. Але і ў прасторнай актавай зале адміністрацыі ўсе ледзь змясціліся, піша kp.by.

Жыхары: «Я нядаўна зрабіла рамонт і не хачу пераязджаць!»

У плане гаворка ідзе пра тэрыторыі Партызанскага праспекта, чыгункі Менск-Масква і ландшафтна-рэкрэацыйнай зоны. Паводле праекта там знясуць больш за 40 малапавярховікаў і пабудуюць на іх месцы новыя дамы.

- Каля чыгункі мяркуецца размяшчэнне двух паркінгаў і вялікай адкрытай стаянкі, - тлумачыць архітэктар праекта Святлана Сахарава з «Мінскграда». - Плануецца знос малакаштоўнай 2-павярховай забудовы, рэканструкцыя 4-павярховых дамоў 60-х гадоў будаўніцтва з надбудовай...Прапануецца вынас прадпрыемстваў, напрыклад, часткі ўчасткаў вытворчасці ААТ «Будмаш», асабліва ліцейнага цэха. Недапушчальна, каб у цэнтральнай частцы горада захоўваліся аб'екты, якія маюць санітарна-ахоўныя зоны 100 метраў ад жылых кварталаў і сацыяльных аб'ектаў.

Дамы на вуліцах Нахімава і Судмаліса хочуць перавесці ў статус грамадскіх. Адпаведна, жыхароў чакае пераезд.

- Гэтыя малапавярховікі маюць гістарычнае значэнне, - кажа Таццяна, адна з жыхароў. - Гэта маленькі куток пасляваеннага Менска, які ў нас застаўся, а вы хочаце там пабудаваць шкельцы! Я жыву на вуліцы Нахімава, там 100 кватэр, у кожнай па чатыры жыхары. Колькі людзей вы пазбаўляеце камфорту, жылля! Вы спрабуеце перасяліць іх на ўскраіну і зладзіць інвестыцыйную палітыку горада? У мяне трое дзяцей, адзін з іх - інвалід. Нядаўна я рабіла рамонт, жыву ў добрых умовах і не хачу пераязджаць!

Адміністрацыя: «Згодныя, парковак шмат, будзем пераглядаць»

Пасля выступу архітэктара жыхары пацягнуліся да мікрафона. У асноўным усіх хваляваў знос дамоў. Сваё нежаданне пераязджаць жыхары часта тлумачылі тым, што стан малапавярховікаў яшчэ цалкам добры.

- 25 гадоў мы просім: зрабіце нам хоць нешта, але былі нікому не патрэбныя, - абураецца жыхарка. - А цяпер пра нас занепакоіліся. Але мы самі трымаем гэтыя кватэры, нам ніхто нічога не робіць - ні сантэхніку, нічога. Мы хочам застацца ў сваім раёне!

Калі жыхары звярнуліся да залы з пытаннем: «Хто супраць зносу дамоў?», амаль усе прысутныя паднялі рукі.

- Дамы ў асноўным 50 - 60-х гадоў, досыць вялікі знос. Каб падтрымліваць іх у нармальным стане, патрэбныя вялікія сродкі, - тлумачыць намеснік кіраўніка адміністрацыі Андрэй Бандарэнка. - Гэтыя аб'екты не ўяўляюць гістарычнай каштоўнасці, таму і мяркуецца іх знос і рэканструкцыя. Што тычыцца пытання перасялення жыхароў, то яно ажыццяўляецца паводле ўказа №58 аб абароне маёмасных правоў пры канфіскацыі зямельных надзелаў для дзяржаўных патрэб. Аднак пытанне будзем развязваць, калі знойдзецца інвестар.

Многіх абурыла, што на месцы «сталінак» збіраюцца будаваць паркоўкі.

- Я жыву на Партызанскім праспекце, у нас і так усё загазаванае. Гляджу на колькасць парковак, якія вы збіраецеся будаваць, і жахаюся! - кажа мясцовая жыхарка.

- У метры ўздоўж паркана школы размясцілі падземную паркоўку. Магчыма, дзеці на параплане будуць у школу лётаць? - абураецца Юлія.

У гэтым пытанні адміністрацыя падтрымала мясцовых.

- Пастанова неканчатковая, - адказвае Андрэй Бандарэнка. - Пагаджуся, што шмат падземных паркінгаў, будзем гэта пераглядаць. Усе заўвагі і прапановы наконт плану вы можаце дасылаць нам у адміністрацыю. Абмеркаванне прадоўжыцца да 7 верасня.