Віцяблян, збітых АМАПам, «узнагародзілі» штрафам

Віцябляне маюць маюць намер абскардзіць пастанову суда.

Хлопцы, якія абвінавацілі Віцебскі АМАП у збіцці, атрымалі штрафы ад 5 да 15 базавых велічынь. Такую пастанову вынес 24 жніўня суд Першамайскага раёну абласнога Цэнтру. Працэс паводле гэтай адміністратыўнай справы пад старшынствам суддзі Наталлі Караблінай ішоў з перапынкамі з 8 жніўня, паведамляе tut.by.

Двое мужчын - Уладзіслаў Каваленка і Сяргей Пруднікаў - аштрафаваныя на 5 базавых велічынь (115 рублёў). Яшчэ трое - Уладзімір Ягораў, Сяргей Гарэлікаў і Дзмітрый Рыбакоў - павінны будуць выплаціць па 15 базавых велічынь кожны (345 рублёў).

Са слоў міліцыянтаў, што выступілі на судзе "сведкамі", Каваленка і Пруднікаў не аказвалі супраціву пры затрыманні, самі селі ў службовы аўтамабіль, каб ехаць на медыцынскі агляд, а затым у РАУС. Гэтых мужчын абвінавацілі паводле артыкула 17.1 КоАП (Дробнае хуліганства).

Ягорава, Гарэлікава і Рыбакову інкрымінавалі яшчэ і непадпарадкаванне патрабаванням міліцыі (арт. 23.4 КоАП). На сцвярджэнні работнікаў АМАП, Ягораў, Рыбакоў і Гарэлікаў не падпарадкоўваліся іх патрабаванням: «гучна мацюкаліся», станавіліся «ў баявую стойку», «размахвалі рукамі». Таму, як сведчылі на судзе АМАПаўцы, да гэтых хлопцаў яны вымушаныя былі ўжыць фізічную сілу і спецсродкі - газавы балончык, гумовую палку і кайданкі.

Нагадаем, інцыдэнт, які разглядаў суд, адбыўся блізу трох гадзін ночы з 26 на 27 ліпеня на ўскраіне Віцебска - каля прыпынку грамадскага транспарту ў раёне рачнога порта. Тут знаходзілася кампанія з пяцярых хлопцаў - Гарэлікава, Ягорава, Рыбакова, Пруднікава, Каваленкі. Яны стаялі каля машыны, з салона якой гучала музыка. Пачуўшы яе, да кампаніі пад'ехаў нарад міліцыі.

Гэта адзіныя факты, у якім сыходзяцца абодва бакі - і пяцёра сяброў, і міліцыянты, якія іх затрымлівалі. Далейшыя паказанні разыходзяцца. У корані адрозніваюцца тры моманты.

Першы. Кампанія не хавае, што сярод пяцярых быў цвярозы толькі адзін - Сяргей Гарэлікаў, кіроўца машыны, якая належыць Сяргею Пруднікаву. Але хлопцы сцвярджаюць, што яны пілі піва да таго, як да іх пад'ехала міліцыя. Гэта адбылося ў бары «Карчага». Затым, пасля закрыцця ўстановы, яны прыехалі на ўскраіну Віцебску, дзе проста слухалі музыку і спіртное больш не ўжывалі. Але міліцыянты «прыпісалі» ім чужыя шкляначкі, якія, са слоў сяброў, валяліся на прыпынку.

Са слоў жа міліцыянтаў, у момант іх прыезду хлопцы трымалі ў руках пластыкавыя шкляначкі, а адзін з іх - бутэльку.

Другі. Сябры сцвярджаюць, што месца, якое яны выбралі для адпачынку і праслухоўвання музыкі, - бязлюднае. Амапаўцы жа кажуць, што паблізу ад прыпынку, метрах за 50, на вуліцы Максіма Горкага стаіць жылы дом.

Трэці. Удзельнікі кампаніі распавялі на судзе, што міліцыя зрабіла жорсткае затрыманне. Па выразе Сяргея Гарэлікава і Уладзіміра Ягорава, іх «задзьмулі» балончыкам, збілі дубінкамі. Гарэлікаў здымаў усё, што адбываецца на відэа ў сваім мабільным, таму гаджэт забралі, відэа выдалілі, а тэлефон разбілі.

Ягораву, з яго слоў, амапаўцы зламалі руку. У суд ён падаў даведку ад лекара з дыягназам - «пералом локцевы косткі». Акрамя таго, Уладзімір сцвярджае, што на руцэ ў яго быў след ад міліцэйскага берца. Фотаздымак з гэтым следам захавалася ў тэлефоне аднаго з удзельнікаў кампаніі - Уладзіслава Каваленкі. Каваленка паказваў гэты здымак суддзі на працэсе.

Сляды ад дубінак на сваіх тварах і целе Сяргей Гарэлікаў і Уладзімір Ягораў выклалі ў інтэрнэт. Яны шырока разышліся па сацыяльных сетках і сайтам. Маладзёны таксама знялі пабоі і звярнуліся з заявамі ў УУС аблвыканкама і Следчы камітэт, абвінаваціўшы супрацоўнікаў АМАПа ў збіцці.

Сілавікі на судзе патлумачылі, што яны «спрабавалі знайсці паразуменне з гэтымі грамадзянамі», прасілі іх выключыць музыку і з'ехаць дадому. Але хлопцы працягвалі лаяцца, паводзілі сябе агрэсіўна, спрабавалі біцца, хапалі іх за форменнае адзенне. Тады прыйшлося выклікаць падмацаванне. Пасля чаго, пасля неаднаразовых папярэджанняў, да Ягорава, Рыбакова і Гарэлікава прыйшлося ўжыць дубінкі, газ і кайданкі.

Але пры гэтым міліцыянты сцвярджалі, што яны «дзейнічалі толькі ў адпаведнасці з законам». І акцэнтавалі ўвагу суда на тое, што ўсе сілавыя дзеянні яны здзяйснялі толькі пасля «неаднаразовых папярэджанняў».

Гарэлікаў, Ягораў, Пруднікаў і Каваленка паведамілі, што яны маюць намер абскардзіць пастанову суда.