У Воршы пенсіянер зладзіў стральбу

Падзеі развіваліся як у баевіку, хоць пачыналася ўсё мірна.

А 6 раніцы гараджанін традыцыйна выйшаў з хаты, каб выгуляць сабаку, у выніку шпацыр падоўжыўся ледзь не да вечара. Уладальнік сабакі паспеў за гэты час выпіць порцыю бальзаму, пасля чаго наважыў звесці рахункі з даўнімі крыўдзіцелем. Калісьці ў яго быў канфлікт з уладальнікам шклопрыёмнага пункта, размешчанага ў раёне гаражоў. Туды і адправіўся грамадзянін нападпітку. Дачакаўся гаспадара, а калі той пад'ехаў на аўтамабілі - двойчы стрэліў з газабалоннага пнеўматычнага пісталета. Пабіў аўтамабіль. Кіроўцу, на шчасце, не закрануў, але прымусіў яго рэціравацца з месца здарэння. А пакуль пацярпелы тэлефанаваў у міліцыю, працягнуў свае прыгоды, паведамляе прэс-служба МУС.

На гэты раз «герою» не спадабалася жанчына, якая ішла да свайго хлява разам з братам мужа. Абурыўся: што вы, маўляў, тут ссоўваецеся без справы? І ўдарыў даму па твары, потым штурхнуў - яна ўпала. Хуліган на час знік з поля зроку, а калі сваякі вярталіся дадому, то зноў сустрэлі разгулянага сабакара. На гэты раз у яго руках быў перароблены з сігнальнага пісталета самапал. Стрэліў двойчы на адлегласці выцягнутай рукі ад ахвяры. І абодва разы, на ягонае бурнае абурэнне - асечка. Тады пенсіянер дзяржальняй ударыў гараджанку тры разы па галаве. Тая абмякла. Сваяк заступіўся і паклаў дэбашыра на зямлю, але буян вырваўся і ўцёк. Калі яго знайшла міліцыя, ён ужо паспеў зладзіць пагром ва ўласным доме, пры затрыманні супраціўляўся. Старэйшы памочнік пракурора Аршанскага раёна Дзмітрый Варапаеў мяркуе, што злачынец атрымаў па заслугах:

- За пагрозу забойствам, хуліганства, незаконнае захоўванне і нашэнне агнястрэльнай зброі суд прысудзіў яго да шасці з паловай гадоў пазбаўлення волі ў калоніі ўзмоцненага рэжыму. Акрамя таго, фігурант рэзананснай справы абавязаны выплаціць уладальніку пашкоджанага ім аўто блізу 3,5 тысячы рублёў шкоды.