«Днямі расейцы ўтапілі танк у вадаёме»
34- 21.09.2017, 8:22
- 87,327
Што робіць у Беларусі Кантэміраўская дывізія пасля афіцыйнага заканчэння вучэнняў «Захад-2017».
На станцыі Вярэйцы пад Асіповічамі пачалася пагрузка бронетэхнікі Кантэміраўскай дывізіі 1-й танкавага войска, якое ўдзельнічала ў вучэннях «Захад-2017» на тэрыторыі Беларусі, паведамляе «Белсат».
Пагрузка, якая пачалася яшчэ ў першай палове дня 20 верасня, адбывалася ля пасажырскай станцыі на вачах мясцовых жыхароў. Тэхніку таксама добра відаць і з электрычак, якія курсуюць паміж Асіповічамі і Менскам.
«Усіх ворагаў перамаглі - вось і з'язджаем», - жартуе расейскі капітан, якога журналісты сустрэлі ў краме каля станцыі.
Патруль беларускай камендатуры тлумачыць: тыя падраздзяленні, баявая задача якіх ужо была выкананая, пачалі пагрузку сёння, яшчэ да афіцыйнага заканчэння манеўраў. Але частка расейскіх вайскоўцаў пакуль застаецца на палігоне.
20 верасня ў Вярэйцах грузіўся Ямпальскі мотастралковы полк Кантэміраўскай дывізіі - байцы з адпаведнымі нашыўкамі нясуць варту з абодвух бакоў чыгункі.
«Жылі мы тут у намётах, побач з палігонам. Шмат нас было. А цяпер вось вяртаемся... Вучэнні прайшлі паспяхова», - распавядае радавы Ямпальскага палка Андрэй.
Суразмоўца «Белсата» - кантрактнік, служыць у войску 1,5 года. Нарадзіўся ён ва ўкраінскім Днепрапятроўску (цяпер - Днепр), але пражыў усё жыццё ў Расеі. Андрэй упэўнены: Расея - самая магутная краіна ў свеце.
«Калі б мы хацелі вас акупаваць - мы б акупавалі, і вы нават не зразумелі б нічога. Проста хадзілі б потым і дзіваваліся, што сталі расейцамі. Як мы з Крымам зрабілі... Расея - вялікая дзяржава. Яе ніхто ніколі не пераможа», - кажа Андрэй.
Тым часам кіроўца таксоўкі, які падвозіў журналістаў у Вярэйцы, успамінае:
«На днях расейцы ўтапілі танк у вадаёме - грыбнікі фатаграфавалі і смяяліся. А наогул, стралялі яны і за межамі палігона. Проста пры дарозе можна было ўбачыць, як страляюць», - кажа ён.
Нагадаем, 20 верасня - фінальны дзень супольных стратэгічных манеўраў «Захад-2017». Цяпер, паводле інфармацыі Мінабароны, цягам дзесяці дзён расейскія войскі павінны пакінуць тэрыторыю Беларусі, а беларускія - вярнуцца ў месцы сталай дыслакацыі.
Сёлета да вучэнняў «Захад-2017» было прыкаваная асаблівая ўвага міжнароднай супольнасці.
На брыфінгах прадстаўнікі Мінабароны неаднаразова падкрэслівалі «празрыстасць» усіх мерапрыемстваў, звязаных з «Захадам-2017». Разам з тым, на спецыяльна створаным сайце не паведамляліся важныя дэталі. Напрыклад, не была апублікаваная інфармацыя аб канкрэтных падраздзяленнях 1-а танкавага войска, якія бралі ўдзел у манеўрах, не ўдакладнялася, на які аэрадром прыбывала расейская авіяцыя.