Пошукі хлопчыка ў Белавежскай пушчы: Якія «зачэпкі» і сляды ёсць на сёння

Стартаваў дзявяты дзень пошуку зніклага 10-гадовага хлопчыка Максіма Мархалюка.

Уначы валанцёраў у лес не пусцілі: пошукі працягваліся з дапамогай беспілотніка і цеплавізара. На жаль, на 11 раніцы нядзелі інфармацыі аб зніклым па-ранейшаму няма.

- Начныя пошукі не далі ніякіх вынікаў, - распавялі оnliner.by ў прэс-службе УУС Гарадзенскага аблвыканкама. - Сёння пошукавыя работы працягваюцца па старой схеме, таксама будзе працаваць авіяцыя. Усё ў ранейшым рэжыме. Пакуль, на жаль, інфармацыі няма.

Паводле звестак ПВА «Анёл», сёння валанцёраў менш. Паводле папярэдніх ацэнак, у пошуку бяруць удзел блізу 1500 чалавек.

- Квадрат пошукаў пашырылі, усё ідзе па ранейшым плане, - распавёў камандзір ПВА «Анёл» Сяргей Коўган. - Дзякуй вайскоўцам. Мы звярнуліся ў Міністэрства абароны, папрасілі даслаць палявую кухню. Учора ўвечары прыехалі тры разлікі. Яны накармілі людзей вячэрай, сёння цэлы дзень таксама будуць карміць.

Сёння з раніцы людзі зноў сталі прачэсваць лес. Кажуць, пра спыненне пошукаў пакуль што размова не ідзе.

- Яны працягнуцца. Вядома, не ў тым маштабе, што на мінулым тыдні, калі было 500 чалавек, потым два дні па 700, потым дзве тысячы і сёння паўтары. Людзям многім на працу трэба, - тлумачыць Сяргей. - Але ўсё роўна нам пішуць, тэлефануюць, кажуць, што гатовыя прыехаць заўтра. Шукаць Максіма мы будзем. У нас бывалі выпадкі, што мы ўжо спынялі пошукі, здавалася, усё, усё безвынікова, і вось у гэты момант чалавека знаходзілі.

- На жаль, актывізавалася велізарная колькасць «экстрасэнсаў» і «празорцаў». У кожнага свая версія, - дадае Сяргей. - Многія просяць, каб мы да іх прыслухаліся. За час нашай працы ніводны экстрасэнс ці празорца яшчэ ні разу не паказаў дакладнае месцазнаходжанне зніклага. Калі б яны маглі гэта рабіць, паверце, мы б набралі сабе ў штаб не валанцёраў, а экстрасэнсаў.

Нагадаем, што калі праз 10 дзён з моманту знікнення (да 26 верасня) Максіма не знойдуць, то міліцыя перадасць інфармацыю ў Следчы камітэт. І за справу возьмуцца ўжо следчыя.

Што за восем дзён пошуку атрымалася выявіць у лесе?

Будан

Ён знаходзіцца неглыбока ў лесе. Менавіта ў гэты будан, са слоў сяброў Максіма, ён і паехаў, сказаў, што пойдзе за грыбамі, і клікаў іх. Але яны не пагадзіліся.

Кошык з грыбамі

Так, каля будана знайшлі кошык з грыбамі. Але, як высветлілася, ён не належыў хлопчыку. А вось ровар, са слоў бацькі Максіма, як раз і быў ля будана.

Адзенне

Учора валанцёры знайшлі ў лесе адзенне. Яго перадалі бацькам, але аказалася, што гэта не рэчы Максіма.

Сляды

Невядомыя сляды валанцёры знайшлі на гліне. Праўда, нельга сказаць, што гэта адбіткі абутку Максіма.

Кармушка

Кармушка, дзе нібыта мог адпачываць хлопчык. Так, сапраўды, кармушку, у якой мог ляжаць чалавек, знаходзілі. Але дакладна вызначыць, што гэта быў Максім, немагчыма.

Фактычна пакуль не знойдзена ніякіх слядоў хлопца ў пушчы, акрамя ровара. Пошукі працягваюцца.