«Ледніковы перыяд»: Жыхары Серабранкі на шмат гадзін засталіся ў мароз без ацяплення

Цеплатрасу, якую прарвала, не ўдалося хутка аднавіць.

Халодна раптам стала не толькі на дварэ, але і ў дамах на праспекце Ракасоўскага і на 2-м Роварным завулку ў Менску.

У аўторак а 15.10 тут зніклі цяпло і гарачая вада. Прычына таму – пашкоджанне адцінку цепласетак. Як працавалі аварыйныя службы, чым ратаваліся ад холаду жыхары жылых дамоў, паведамляе агенцтва «Мінск-Навіны» са спасылкай на «Р».

Мінакоў на 2-м Роварным завулку а 10.00 мала, затое тут на ўсю моц капаюць рыдлёўкамі работнікі аварыйна-аднаўленчай службы «Мінскія цеплавыя сеткі», працуе экскаватар. Мы знаходзімся акурат ля ўваходу ў школу №164. Менавіта перад ёй і быў пашкоджаны адцінак цепласетак, які да ночы аднавілі. Але работы яшчэ не скончыліся.

У раскапанай яміне віднеецца труба: брыгада прадумвае, як экскаватару пад'ехаць, каб жалезабетоннымі зводамі яе закрыць.

— А пасля ўсе забетануем, зробім гідраізаляцыю, засыплем грунтам, пасля чаго пакладуць асфальт, — майстар службы Уладзімір тлумачыць ход дзеянняў. Але мяне цікавіць, што адбылося першапачаткова. – Так, сапраўды, была аварыя, але, як кажуць, аперацыя прайшла паспяхова — усе непаладкі ліквідаваныя.

Занурымся ў падзеі аўторка. На месца пашкоджання трубаправода на размеркавальных цепласетках адразу выехалі дзве аварыйна-аднаўленчыя брыгады, прыгналі два самаскіды, адзін экскаватар, спецтэхніку з кранам. Да працы падключыліся і супрацоўнікі ДАІ, якія дапамагалі арганізаваць рух. Заданне для аварыйнай службы – замяніць адцінак трубаправода дыяметрам 500 міліметраў, даўжынёй 4 метра. Што стала прычынай надзвычайнага здарэння? Пракаментаваў сітуацыю галоўны інжынер філіяла «Мінскія цеплавыя сеткі» РУП «Мінскэнэрга» Аляксандр Драгун:

— Калі ўзяліся за рамонтныя работы, то адразу ўбачыць праблему не маглі. Ёсць такое паняцце, як «непрахадны канал» — месца, недаступнае для агляду. Толькі пры ўскрыцці можна было ўбачыць, у чым непаладка. Высветлілася, паміж плітамі перакрыцця прасочваліся ападкі. Яны прывялі да станчэння металу — адбылося пашкоджанне.

На гэтым адцінку цепламагістралі трубаправод закладзены ў 1991 годзе. Гэта значыць ён адпрацаваў ужо больш за 25 гадоў. Так што прычынай аварыйнай сітуацыі, са слоў галоўнага інжынера, сталі не маразы, а менавіта знос трубаправода – яго сценкі настолькі станчэлі, што проста не вытрымалі.

— Мы досыць хутка зрабілі адключэнне гэтага адцінку трубаправода. Жылы дом №40 на Ракасоўскага, два інтэрнаты і гатэль на 2-м Роварным завулку патрапілі ў зону адключэння. Да 1.30 ночы цеплазабеспячэнне было адноўлена, — працягвае Аляксандр Аляксандравіч. — Важна разумець: усе дамы маюць назапашвальныя здольнасці. Пры цяперашніх тэмпературах вонкавага паветра адсутнасць цеплазабеспячэння не моцна паўплывала на тэмпературу ў кватэрах. Хіба што яна апусцілася на пару градусаў. Так што крытычнай сітуацыі не было і няма. Мы даўно набілі руку на ліквідацыі такіх непаладак і робім гэта даволі хутка.

Да 1.30 ночы цеплазабеспячэнне было адноўлена

У момант інцыдэнту, а 15.10, парушаўся гідраўлічны і тэмпературны рэжым у зоне цеплазабеспячэння мінскай ЦЭЦ-2. Таму некалькі гадзін назіраліся паніжаныя параметры тэмпературы гарачай вады і ацяплення дамоў, залежных ад гэтай цеплакрыніцы. Што скажуць людзі, якія, прыйшоўшы пасля працы дадому, зразумелі, што іх жыллё не зусім цёпла сустракае? Ганна, жыхарка дома на праспекце Ракасоўскага, 30/2, дзеліцца:

«З 18 кастрычніка 2017 года ў дзіцячым пакоі нашай кватэры адсутнічае ацяпленне, халодная батарэя. Вымушаныя ўключаць абагравальнік, які расходуе шмат электраэнэргіі. Звярталася ў службу 115 шматкроць, яны перадавалі заяўку ў ЖЭУ, але тыя не выканаўшы яе, закрывалі. Напісала электронны зварот у ЖРЭА. Прыйшла адпіска, што разглядаюць зварот. Заканадаўства наогул дзейнічае ў нашай краіне або да ЖЭУ не выкарыстоўваецца ўказ Лукашэнкі аб своечасовым выкананні паслуг насельніцтву? Можа ваша рэдакцыя дапаможа разабрацца? Вераніка Місякова, Менск».

— Прыйшла дадому, падумала: «Штосьці не так, як звычайна...» Пакратала батарэі халодныя. Але тэлефанаваць у аварыйную службу не стала, часу не было. Я лекар. Толькі прыехала са змены, і трэба было ехаць на начную. Калі раніцай зноў вярнулася дадому, было цёпла. Супакоілася.

Валянціна, жыхарка дома на праспекце Ракасоўскага, 18/1, распавядае, што асабліва не адчула перамен у кватэры:

— Даведалася, што не паляць, калі патэлефанавала суседка: «Дакраніся да батарэі!» Ну, кранула: халодныя. Так, трошкі было халадней, але гэта не страшна. Уночы адчула, што цяпло вярнулася.

А вось жыхарка дома №30/2 Святлана кажа, што спякоту не любіць, але ўсё ж у аўторак цёплыя шкарпэткі давялося надзець:

— Прыйшла з працы. Адчуваю, халаднавата. Потым халадней, халадней, яшчэ халадней... Тэлефаную на нумар 115, адказваюць: «Прарыў цеплатрасы. Працуем». Добра, думаю. І шкарпэткі надзела. Але паверце, было халаднавата толькі пару гадзін і не настолькі, што вытрымаць нельга.

Спадарыня, якая шпацыравала з сабакам, жыве ў доме №12/1, успамінае свае адчуванні:

— Заходжу на кухню – прахалодна. Дай, думаю, пакратаю батарэю: яна нейкая па-летняму цёплая... Але нікуды не тэлефанавала. Надумала прыгатаваць вячэру. А на кухні ж, ведаеце, калі гатуеш, то цёпла. Гадзіну прайшла, і цяпло вярнулася.

Дарэчы, а як жа госці гатэля, якія відавочна не чакалі сэрвісу з халадком? Там жа не толькі батарэі не грэлі, але і не было гарачай вады. Вольга Захарчанка, загадчыца гатэля «Іст Тайм» на 2-м Роварным завулку, 5, запэўнівае: «Ніхто не скардзіўся. Жыхары сказалі, што быў лёгкі дыскамфорт, і папрасілі дадатковыя цёплыя коўдры».