22 траўня 2018, aўторак, 22:17
Рубрыкі

Першы танкер з газам з РФ для ЗША развярнуўся пасярод Атлантыкі

16

З невядомай прычыны судна накіравалася ў Гішпанію.

ЗПГ-танкер Gaselys кампаніі Engie, які вязе груз звадкаванага газу з Расеі, разгарнуўся ў Атлантыцы за дзень да прыбыцця ў Бостан, паведамляе РБК са спасылкай на Bloomberg. З невядомай прычыны судна накіравалася ў Гішпанію.

Танкер з вырабленым у Расеі звадкаваным прыродным газам, які накіроўваўся ў ЗША, за дзень да прыбыцця ў порт прызначэння развярнуўся і ўзяў курс на Гішпанію, паведамляе агенцтва Bloomberg.

Паводле звестак агенцтва, СПГ-танкер Gaselys кампаніі Engie знаходзіцца ў шляху ўжо тры тыдні. Ён вязе груз звадкаванага газу з брытанскага тэрмінала Isle of Grain, размешчанага ў графстве Кент, у амерыканскі Бостан, у рэгазіфікацыйны тэрмінал Everett, паводле звестак партала MarineTraffic. Gaselys прыбыў у брытанскі Isle of Grain неўзабаве пасля таго, як туды была дастаўленая першая партыя звадкаванага газу з «Ямал ЗПГ». Паведамлялася, што расейскі ЗПГ плануюць рээкспартаваць.

Аднак з невядомых пакуль прычын судна развярнулася назад у бок Еўропы, узяўшы курс на гішпанскі порт Альхесірас, размешчаны ў Гібралтарскім праліве. Прадстаўнікі Engie не змаглі аператыўна адказаць агенцтву на пытанне аб прычынах развароту танкера.

Афіцыйны прадстаўнік НОВАТЭКа заявіў РБК, што яму невядомыя прычыны, з якіх танкер са звадкаваным газам памяняў кірунак. «Мы прадалі гэты газ, ён памяняў уласніка. Наш танкер быў разгружаны ў Вялікабрытаніі. Аб астатнім трэба пытаць новага ўласніка - кампанію Engie», - заявіў ён. Раней НОВАТЕК у якасці пакупніка першай партыі звадкаванага газу называў «дачку» малазійскі Petronas, Petronas LNG UK Limited.

Уладальнік кампаніі Lombi Gas Marketing&Trading Раман Мацаеў мяркуе, што адзінай разумнай прычынай развароту танкера з расейскім ЗПГ за дзень да Бостана і яго перанакіраванне ў бок узбярэжжа Гішпаніі можа заключацца толькі ў санкцыйнай палітыцы ЗША. У гэтай сітуацыі няма эканамічнай мэтазгоднасці ў перанакіраванні танкера са звадкаваным газам у Атлантычным акіяне. Трэйдару (у гэтым выпадку Engie) значна танней было б адправіць груз ў Гішпанію з Вялікабрытаніі, дзе газ памяняў бы ўладальніка, мяркуе ён.

НОВАТЭК 5 снежня заявіў пра запуск першай чаргі завода «Ямал ЗПГ» па вытворчасці звадкаванага прыроднага газу магутнасцю 5,5 млн т ЗПГ у год.

Да красавіка 2018 года газ з «Ямал ЗПГ» будзе прадавацца на спотавым рынку, пасля гэтага пачнуцца пастаўкі паводле доўгатэрміновых кантрактаў. «Ямал ЗПГ» на 50,1% належыць НОВАТЭК, па 20% - у французскай Total і кітайскай CNPC, яшчэ 9,9% - у кітайскага Фонду Шаўковага шляху.