«Калі дзеці захочуць, то яны знойдуць спосаб збегчы»

Журналісты праверылі, наколькі надзейна зачыненыя брамкі і дзверы ў дзіцячых садках.

У сувязі з рэзананснай гісторыяй уцёкаў трох-, чатырохгадовых дзяцей з дзіцячага садка ў Светлагорску Intex-press спытала ў чыноўнікаў сістэмы адукацыі, як павінна забяспечвацца бяспека малых на тэрыторыі дзіцячага садка, ці павінны быць зачыненыя брамы і ўваходныя дзверы ў сад на працягу дня і чым гэта рэгулюецца.

У аддзеле адукацыі, спорту і турызму Баранавіцкага гарвыканкама карэспандэнтам Intex-press паведамілі, што для забеспячэння ўваходу і выхаду ва ўстановах дашкольнай адукацыі нашага горада на тэрыторыю і ў будынак з 7.00 да 8.30 і з 16.30 да 17.30 (19.00), згодна з часам работы ўстаноў, брамкі і ўваходныя дзверы адчыненыя.

У астатні час дзверы, акрамя цэнтральнай брамкі і цэнтральнага ўваходу, зачыняюцца. Брамкі зачыняюцца на замкі, дзверы - клямку альбо засоў, які размешчаны вышэй, чым рост дзіцяці. У выходныя і непрацоўныя дні яны зачыненыя пастаянна.

Таксама на працягу працоўнага дня брамы для ўезду аўтатранспарту на тэрыторыю дзiцячага сада павiнны быць зачынены на клямку або засоў. Яны могуць быць адкрыты, калі на тэрыторыі знаходзяцца аўтамабілі экстраных і камунальных службаў, а таксама машыны, якія ажыццяўляюць падвоз прадуктаў і рамонтныя работы ў дзіцячых садках.

Што ўбачылі журналісты

Карэспандэнты Intex-press абышлі некалькі дзіцячых садкоў, каб паглядзець, ці зачыненыя там брамкі і ці лёгка дзецям выйсці за тэрыторыю садка.

Яслі-сад №23 на вуліцы Берасцейскай. Брамы высокія (прыкладна 1,6 м), у плоце няма дзір, брамкі і вароты для ўезду аўтатранспарту зачыненыя. Уезды для грузавога транспарту зачыненыя на навясныя замкі, а брамка, якая вядзе да галоўнага ўваходу, на кручок. Кручок знаходзіцца досыць высока для дзіцяці, адкрыць брамку без старонняй дапамогі яму будзе складана.

У яслях-садзе №32 на вуліцы Герцэна плот таксама высокі, пералезці праз яго дзіця не зможа. Абодва ўезды зачыненыя, а брамка замыкаецца на клямку.

Мама, дзіця якой наведвае гэты дзіцячы сад, сказала Intex-press, што чула пра тое, што адбылося ў светлагорскім дзіцячым садзе.

- Думаю, у нашым такога адбыцца не можа. Тут за бяспекай дзяцей сочаць строга, - кажа яна. - На ўвесь дзень закрываюць будынак дзіцячага садка, а адкрываюць толькі падчас прагулкі і пасля трох гадзін дня для бацькоў.

Таксама жанчына распавяла, што, калі яна толькі аддала дачку ў дзіцячы садок, назірала за тым, як праходзіць шпацыр, і засталася задаволеная: дзеці гуляюць разам і побач увесь час знаходзіцца выхавальніца.

Калі дзеці захочуць, то яны знойдуць спосаб збегчы

Дзіцячы садок на бульвары Хэйнала. Тут плот невысокі, але дзіця наўрад ці зможа праз яго пералезці. Агароджа цэлая, няма дзір і ям, праз якія змаглі б пралезці дзеці. Каб трапіць на тэрыторыю, трэба прайсці праз галоўны ўваход. Уезд для грузавога транспарту знаходзіцца са зваротнага боку, ён быў адкрыты, і некаторыя бацькі ішлі за сваімі дзецьмі менавіта праз гэтую браму. Нягледзячы на тое, што брама не зачыненая, яна высокая і цяжкая, таму дзіцяці ўсё-ткі складана будзе самастойна праз іх выйсці.

Жанчына, якая як раз забірала свайго ўнука, упэўненая, што з гэтага дзіцячага садка дзецям дакладна не атрымаецца збегчы, бо яны заўсёды пад наглядам.

- У групе майго ўнука блізу 20 дзяцей, і за імі прыглядаюць два выхавацелі. На тэрыторыі саду ўсё зачынена, нянечкі не пакідаюць дзяцей адных. Але ведаеце, я думаю, калі дзеці захочуць збегчы, то яны знойдуць спосаб, - распавяла жанчына.

У яслях-садзе №15 на вуліцы Курчатава агароджа, як і ў іншых садках, высокая, у плоце няма дзірак. Брамка зачыненая на засоў, а галоўная брама - на замок. Аднак уезд для грузавых аўтамабіляў быў прыадчынены і дзіця магло б выйсці праз гэтую браму.

У двух наступных дзіцячых садках - №43 і №40 - з агароджай усё ў парадку: платы высокія, усе брамкі зачыненыя.

Загадчыца аднаго з дзіцячых садкоў распавяла, што ў садзе брамкі замыкаюць на цэлы дзень. Акрамя гэтага, з ясельнымі дзецьмі звычайна выходзяць выхавальнік і яго памочнік. Брамка, праз якую бацькі могуць прайсці ў дзіцячы сад, замыкаецца на кручок. А калі хтосьці лянуецца зачыняць за сабой веснічкі, то гэта робіць дворнік.

Дарэчы

У двух баранавіцкіх садках для бяспекі дзяцей устаноўленыя сістэмы відэаназірання за кошт пазабюджэтных і спонсарскіх сродкаў установы. Бацькі яшчэ аднаго дзіцячага сада паведамілі Intex-press, што пасля здарэння ў Светлагорску ў іх дзіцячым садку пачалі ўсталёўваць кодавыя замкі, за чый кошт, пакуль не вядома.