У Берасці з'явіліся налепкі на аўто супраць акумулятарнага завода

Жоўтыя трыкутнікі ўчора раздавалі ў месцах збору подпісаў за спыненне будаўніцтва завода.

У Берасці з'явіліся жоўтыя налепкі на аўтамабілі, якія паказваюць негатыўнае стаўленне да з'яўлення акумулятарнага завода ў СЭЗ «Брэст» за 4 кіламетры ад абласнога цэнтра.

Як паведамілі «БГ» актывісты кампаніі супраць будаўніцтва гэтай вытворчасці, першая партыя налепак была выпушчаная ў канцы мінулага тыдня. У нядзелю 21 студзеня іх раздавалі ў месцах збору подпісаў за спыненне будаўніцтва завода. Варта адзначыць, што ў гэты дзень збор подпісаў быў арганізаваны практычна ва ўсіх раёнах горада. Праўда, анансаваны збор каля рынка «Лагуна» ў Кавалева не адбыўся, і адзін жыхар, не дачакаўшыся людзей з падпіснымі лістамі, адмыслова прыехаў да ЦУМу.

Паводле стану на 20 студзеня было сабрана 13 тысяч подпісаў, 21 студзеня гэтая лічба пераадолела 15-тысячны рубеж. Збор доўжыцца.

Нагадаем, у пачатку студзеня ў Берасці і раёне разгарнулася маштабная кампанія супраць з'яўлення акумулятарнага завода «АйПауэр», які ў канцы мінулага года пачаў будавацца ў СЭЗ «Брэст». 15 студзеня ў Тэльмінскім доме культуры з ініцыятывы групы актывістаў была арганізаваная сустрэча з мясцовымі жыхарамі. Чыноўнікі і бізнэсоўцы спрабавалі пераканаць тых, хто сабраўся ў тым, што завод бяспечны і парушэнняў на ўсіх этапах узгаднення праекта не было, але ім гэта не ўдалося.

Актывісты кампаніі пры падтрымцы гараджан і жыхароў раёна маюць намер і далей дамагацца як мінімум прыпынення будаўніцтва і правядзення паўторных грамадскіх абмеркаванняў праекта не толькі сярод жыхароў Берасцейскага раёна, але і сярод гараджан. Цяпер ідзе актыўная падрыхтоўка да далейшых дзеянняў.