Як Павел Верабей становіцца найлепшым беларускім абаронцам у КХЛ

Здаецца, менскае «Дынама» ўпусціла вельмі перспектыўнага хакеіста.

Павел Верабей праводзіць класны дэбютны сезон у КХЛ: на рахунку абаронцы 12 (4+8) балаў у 51 гульні за «Куньлунь». У нядаўнім матчы супраць менскага «Дынама» ён быў асістэнтам другога пераможнага гола ў браму Энрота (3:1), а яшчэ летам пагаворвалі аб тым, што Верабей падпіша кантракт з «зубрамі», піша pressball.by.

Упершыню пра Паўла ўсур'ёз загаварылі перад леташнім чэмпіянатам свету. Тады Дэйв Льюіс палічыў за найлепшае ўключыць маладога абаронцу ў заяўку на турнір, пакінуўшы за бортам дасведчанага Мікалая Стасенку. Пасля заканчэння чэмпіянату той жа Льюіс распавёў, што Вераб'ём цікавіліся скаўты з НХЛ. Пазначылі цікавасць і «Дынама». Але дамовіцца аб кантракце не здолелі — клуб не прапанаваў прымальныя для хакеіста ўмовы. «З менскім «Дынама» перамоваў фактычна не было. І там умовы былі не тыя, якія мы хацелі», — тлумачыў Верабей.

У выніку Павел паляцеў у Славаччыну, дзе павінен быў падпісаць кантракт са «Слованам». Але ў апошні момант абаронцу перахапілі: «Патэлефанаваў агент і сказаў, што ёсць варыянт з «Куньлунем». Нас усё задаволіла, і 3 ліпеня ўвечары я ўжо быў у камандзе». Абаронца ўклаў з клубам двухгадовы кантракт.

Дэбютную шайбу за новую каманду Верабей збярог для першага хатняга матчу «Куньлуня». Каманда вярнулася ў Пекін пасля сяміматчавай выязной серыі і прымала «Ёкерыт». Пры ліку 0:2 Верабей забіў з перадачы Андрэя Касціцына.

Цяпер Верабей — самы выніковы абаронца ў «Куньлуні». У найбліжэйшага апанента на тры балы менш. А таксама найлепшы гулец каманды ў паказчыку карыснасці. За сезон Паўла двойчы прызнавалі найлепшым маладым гульцом тыдня. На пытанне аб тым, ці задаволены ён сваім дэбютным сезонам у КХЛ, сам хакеіст адказвае сціпла: «Заўсёды, вядома, хочацца выглядаць яшчэ лепш. Аднак я ведаю, над чым мне неабходна працаваць».

Займальны факт: у выніковасці і каэфіцыенце карыснасці Верабей апярэджвае ўсіх абаронцаў менскага «Дынама». Пры гэтым сярэдні айстайм хакеіста «Куньлуня» — 11 хвілін. Менш толькі ў Знахарэнкі. Корабаў і Дзянісаў у суме праводзяць на лёдзе па перыяду за гульню.

Калі ўспомніць іншых абаронцаў-беларусаў, якія выступаюць у КХЛ, сітуацыя практычна не зменіцца. Адназначна лепей глядзіцца Бэйлен: за сезон ён не прапусціў ніводнага матчу, праводзіў на пляцоўцы шмат часу і гуляў вынікова. У Стасенкі і Грабарэнкі дасягненні больш сціплыя.

Кідаецца ў вочы высокі паказчык карыснасці Вераб'я — тут моцна саступае нават Бэйлен. Пытанне толькі ў тым, у якіх матчах трэнер дае Вераб'ю гуляць больш. Напрыклад, у гульні са СКА (1:8) абаронца правёў на лёдзе менш за пяць хвілін.

Са статыстыкай карысных дзеянняў у сезоне ў Вераб'я справы ідуць крыху горш. Але толькі на першы погляд.

У параўнанні з дынамаўцамі абаронца лідаруе ў колькасці кідкоў і нядрэнна іх рэалізуе. Кожны дваццаты стрэл прыводзіць да голу. У той час як у Шынкевіча і Дзянісава з 70 кідкоў дакладным становіцца толькі адзін. У колькасці заблакаваных стрэлаў і сілавых прыёмаў Верабей хутчэй аўтсайдэр. Сілавая гульня пакуль, у прынцыпе, не канёк маладога абаронцы — прыбаўляць трэба грунтоўна. Але патэнцыял ёсць:

Бэйлен апярэджвае Вераб'я ў дакладнасці кідкоў, прыкладна ўдвая часцей кідае, блакуе і хітуе. Але важна не забываць, колькі матчаў хакеісты адыгралі і колькі часу агулам праводзілі на лёдзе.

У Вераб'я і Знахарэнкі айстайм ўдвая меншы, чым у Корабава, Дзянісава, Лісаўца, Грабарэнкі і Бэйлена. Стасенка і Лісавец прапусцілі 40% матчаў чэмпіянату. Для справядлівасці трэба ўзброіцца калькулятарам і разлічыць сярэднія паказчыкі гульцоў на 10 хвілін гульнявога часу за матч — на ўзроўні айстайма Знахарэнкі і Вераб'я.

Выяўляецца, статыстыка Вераб'я ў блакаваных кідкам не такая ўжо і дрэнная. А ў колькасці сілавых прыёмаў Павел можа нават даць невялікую фору Хенкелю. Звярнуць увагу варта і на сур'ёзныя абарончыя паказчыкі Знахарэнкі.

Пасля ўсіх разлікаў выявілася, што статыстычна Бэйлен не такі ўжо і жыхар неба. Агулам ён кідае крыху часцей пры крыху лепшай рэалізацыі. Кідкі спаборніка Нік і Павел блакуюць практычна з аднолькавай частатой. У колькасці сілавых прыёмаў перавага засталося ў Бэйлена. Пры гэтым у плане абарончых дзеянняў абодва моцна саступаюць аднаклубніку Вераб'я — Раману Грабарэнку.

У эйфарыю ўпадаць не варта. Але статыстычна сённяшні Верабей — гэта Нік Бэйлен у маштабе адзін да двух. І ёсць добрыя перадумовы, што пры большым часе на лёдзе абаронца будзе выдатна прагрэсаваць. Шкада толькі, што не ў Менску, а ў Пекіне.