Заробкі, бензін, даляр і нафта: 10 гадоў экспэрыментаў над беларускімі кіроўцамі

Чаму паліва ў Беларусі не прывязанае да сусветных коштаў «чорнага золата»?

Гэты год запомніцца многім аўтамабілістам: такое падступнае планамернае падаражанне паліва па адной капейцы немагчыма забыцца. «Белнафтахім» звязвае падвышэнне коштаў з ростам кошту нафты, у той час як звычайныя грамадзяне задаюцца іншым пытаннем: калі нам выстаўляюць падвышаны прайс, калі «чорнае золата» даражэе, то чаму ж зніжэнне коштаў бензіну/дызелю не адбываецца, калі нафта таннее?

Па каментар журналісты abw.by звярнуліся да эканамічнай аглядальніцы Таццяны Манёнак:

- Быў перыяд, калі ўнутраны рынак паліва быў прыбытковым, але гэты час прайшоў. На ўнутраны рынак пастаўляецца да 30 адсоткаў паліва - і гэта істотна для нашых прадпрыемстваў. Нашыя нафтаперапрацоўчыя вытворчасці вядуць маштабную мадэрнізацыю за крэдытныя сродкі. І яны маюць патрэбу ў далейшым крэдытаванні, бо праекты не закончаныя. Каб атрымліваць новыя крэдыты, вытворчасць павінна быць рэнтабельнай.

Нягледзячы на падвышэнне кошту паліва, у даляравым эквіваленце яно практычна не расце. А даваць ацэнкі ў даляравым эквіваленце мы вымушаныя: разлікі па кантрактах за межамі краіны вядуцца ў валюце.

У Беларусі ажыццяўляецца ручное рэгуляванне коштаў, рабіць нейкія прагнозы вельмі складана. Знізіць акцызы - недалічыцца бюджэту, падвысіць кошты - можа знізіцца попыт. Пакуль падвышэнне нязначнае - попыт не ўпаў, попыт расце. На гэтым рынку павінны быць вельмі тонкія налады і для таго, каб не абвастраць сацыяльную напружанасць. З прычыны магчымай сацыяльнай напружанасці прынятая і «капейкавая» тактыка - у такім фармаце падвышэнне кошту ўспрымаецца лягчэй.