Як забудоўшчыкі абкрадаюць дольшчыкаў

Чаму дзяржава не ў стане іх абараніць?

Надзея, каб набыць кватэру ў жыллёвым комплексе «Аркадыя», прадала бацькоўскае жытло. Уладзімір – залез у пазыкі. Дыяна таксама марыла пра ўласныя квадратныя метры. Але ў выніку жыве з няпоўнагадовымі дзецьмі на арандаванай кватэры, піша «Белсат».

За шэсцьдзесят тысяч даляраў жанчына набыла жыллёвыя аблігацыі. Кошт адной быў прыроўнены да кошту квадратнага метра жытла, і ў залежнасці ад часу, калі людзі ўступалі ў будоўлю, вагаўся ад васьмісот да паўтары тысячы даляраў за штуку.

Дом у сталіцы, у будаўніцтва якога гэтыя людзі ўклалі свае грошы, кампанія «Тамбаз» гэтак і не здала ў эксплуатацыю.

Былы кіраўнік кампаніі-забудоўніка цяпер пад следствам. Высветлілася, што грошы людзей, якія заплацілі за будучыя кватэры 100 адсоткаў грошай, ён выдаткоўваў на будаўніцтва іншых аб’ектаў.

У Менскім гарвыканкаме цудоўна ведаюць сітуацыю, у якой цяпер пакупнікі жыллёвых аблігацыяў. І ўжо кажуць ім, што будоўля дому ў хуткім часе працягнецца дзяржаўным падрадчыкам, якому, відавочна, на працу спатрэбяцца сродкі. Атрымліваецца, што за ўжо выкупленыя квадратныя метры людзям зноў давядзецца плаціць. Колькі – пакуль не паведамляюць.

У 2012 годзе Ігар наважыў палепшыць свае жыллёвыя ўмовы. Праз інтэрнэт знайшоў рыэлтара, які прапаноўваў пабудаваць кватэру паводле адрасу Курганная 35 у Менску. Жытло каштавала па-рознаму: ад васьмісот да тысячы дзвесце даляраў за квадратны метр. Ігар перадаў забудоўніку блізу шасцідзесяці тысяч даляраў, але так і не атрымаў ключы ад кватэры.