Анджэй Дуда: «Паўночная плынь-2» не мае права на існаванне
1- 23.10.2018, 19:46
- 8,996
Прэзідэнт Польшчы ў Бэрліне раскрытыкаваў будаўніцтва газаправода Nord Stream II.
Прэзідэнт Польшчы Анджэй Дуда, знаходзячыся з афіцыйным візітам у Бэрліне, раскрытыкаваў будаўніцтва газаправода Nord Stream II, паведамляе «Радыё Польшча».
Падчас сустрэчы з прэзідэнтам Нямеччыны Анджэй Дуда заявіў, што другая галінка расейскага газаправода з'яўляецца палітычным праектам і пагражае энэргетычнай бяспецы Еўропы.
«Праект Nord Stream II не мае права на існаванне. Мы ўважаем, што ў будучыні гэты газаправод можа нашкодзіць энергетычным стасункам у Еўропе шляхам дамінавання адзінага пастаўшчыка газу на еўрапейскім рынку. Гэты праект таксама ставіць у цяжкае становішча з пункту гледжання энэргетычнай бяспекі па меншай меры некалькі дзяржаў Цэнтральнай і Усходняй Еўропы», - адзначыў кіраўнік польскай дзяржавы.
«Гэта магло быць энэргетычна небяспечным і для Польшчы, калі б не нашы меры, якія мы рэалізуем», - сказаў Дуда, нагадаўшы пра падпісанні 20-гадовага кантракту на пастаўку звадкаванага газу з ЗША.
«Паўночны струмень-2» - гэта палітычны і стратэгічны праект, перш за ўсё, Расеі, перакананы Дуда.
«Мы проста ўважаем, што гэта інвестыцыя, якая не мае нічога агульнага з любым эканамічным разлікам. На жаль, нямецкія фірмы прымаюць у ім (праекце, - рэд.) удзел і гэта дрэнная інфармацыя», - адзначыў ён.
Нагадаем, акрамя Польшчы, супраць будаўніцтва газаправода Nord Stream II выступаюць таксама балтыйскія краіны і Украіна, на думку якіх гэты праект пагражае энэргетычнай бяспецы Еўрапейскага звязу.