У ЗША фермер 30 гадоў падпіраў свае дзверы метэарытам коштам $100 тысяч

Метэарыт дастаўся яму ад папярэдняга ўладальніка фермы.

Фермер з Мічыгана, ЗША, які пажадаў застацца невядомым, распавёў, што камень вагой 22 кг трапіў да яго ў 1988 годзе пры куплі фермы. Папярэдні ўладальнік зямлі сумленна распавёў, што камень прыбыў з космасу падчас метэарытнага дажджу ў 1930-х гадах, інфармуе enovosty.com.

Новы гаспадар не ўбачыў у камені нічога асаблівага, таму 30 наступных гадоў метэарыт выкарыстоўваўся ў якасці падпоркі для дзвярэй. Нядаўна мужчына пачуў, што нават невялікія кавалачкі метэарытаў скупляюць за вялікія сумы, і прыкінуў, колькі можа каштаваць яго камень.

Геолаг з Цэнтральнага Мічыганскага ўніверсітэта Мона Сібеску вывучыла камень і канстатавала, што гэта самы каштоўны асобнік з калі-небудзь бачаных ёю. Цяпер Смітсанаўскі музей разглядае магчымасць куплі каменя.