СМІ: На Макрона збіраліся напасці з нажом, які незаўважны для металашукальніка

План замаху на Макрона быў недапрацаваны.

Затрыманыя французскай паліцыяй за спробу замаху на прэзідэнта Францыі Эмануэля Макрона збіраліся выкарыстоўваць для нападу керамічны нож. Пра гэта са спасылкай на крыніцу ў Генеральным кіраванні ўнутранай бяспекі (DGSI) краіны паведаміў тэлеканал France-2.

Нож у аднаго з затрыманых знайшлі ў аўто. Мяркуецца, што керамічны нож быў выбраны ў якасці прылады забойства праз тое, што на яго не рэагуе металашукальнік.

Паводле звестак тэлеканала, зламыснік павінен быў 11 лістапада змяшацца з натоўпам людзей падчас святкавання 100-годдзя завяршэння Першай сусветнай вайны, а затым нанесці ўдар.

Пра затрыманне шасцярых чалавек ва ўзросце ад 20 да 60 гадоў паведаміла 6 лістапада Reuters. Суразмоўца агенцтва адзначыў, што план замаху на Макрона быў недапрацаваны.