Суд абвясціў прысуд паводле справы Коржыча

Маці загінулага ў Печах жаўнера не згодная з афіцыйнай версіяй следства.

Менскі абласны суд прызнаў сяржантаў вінаватымі ў давядзенні да самагубства шарагоўца Аляксандра Коржыча і прысудзіў Яўгена Бараноўскага да 9 гадоў пазбаўлення волі з канфіскацыяй маёмасці, Антона Вяжэвіча - да 7 гадоў, Ягора Скуратовіча - да 6 гадоў пазбаўлення волі. Усе фігуранты будуць адбываць пакаранне ў калоніі ва ўмовах ўзмоцненага рэжыму, піша tut.by.

У панядзелак, 5 лістапада, Менскі абласны суд абвясціў прысуд паводле справы Аляксандра Коржыча. Тры месяцы суд дапытваў абвінавачаных, пацярпелых, дзясяткі сведак, вывучаў матэрыялы крымінальнай справы. Абвінавачванне на падставе ч.3 арт.455 КК (Злоўжыванне ўладай, якое пацягнула цяжкія наступствы), ч.1, 2 арт.430 (Атрыманне хабару) было выстаўленае сяржантам Антону Вяжэвічу, Ягору Скуратовічу, Яўгену Бараноўскаму. Апошняму яшчэ паставілі ч.1 арт.205 (Крадзеж). Сваю віну сяржанты прызналі часткова, адмаўляючы, што іх дзеянні давялі Коржыча да самагубства.

За 40 хвілін да пачатку працэсу ў холе суда і самой зале было больш за сотню жаўнераў у форме. Вайскоўцы прысутнічалі толькі ў першыя дні працэсу, затым перасталі прыязджаць на пасяджэнні. Амаль тры месяцы 20 лавак пуставалі, на адкрыты суд хадзілі толькі журналісты.

Абвінавачаныя праз клетку і дзясятак канваіраў спрабуюць разгледзець тых, хто сёння прыйшоў на абвяшчэнне прысуду. На іх уважліва глядзяць жанчыны з залы.

Вайскоўцаў сёння так шмат, што некаторыя сталі ўздоўж сцяны.

За некалькі хвілін да пачатку ў залу ўвайшла пацярпелая Святлана Коржыч. Яна з усімі павіталася і прайшла да стала, дзе сядзеў адвакат. Яго ёй далі бясплатна.

Менскім абласным судом усе трое прызнаныя вінаватымі. Яўгена Бараноўскага прысудзілі да 9 гадоў пазбаўлення волі з канфіскацыяй маёмасці, Антона Вяжэвіча - да 7 гадоў, Ягора Скуратовіча - да 6 гадоў пазбаўлення волі. У фігурантаў будзе канфіскаваная маёмасць, яны пазбаўленыя звання. Абвінавачаныя павінны аплаціць судовыя выдаткі, кожны па 1 993 рубля 27 капеек.

- Хлопчыкі, вы ўсё адно выйдзеце, і мамы вас любяць, і дзеці будуць, - звярталася раней у судзе да абвінавачаных мама загінулага жаўнера Святлана Коржыч. - А ў мяне ўжо нічога не будзе. Вы зрабілі вялікую памылку, давядзецца адказваць. Афіцэры сышлі ад адказнасці. Войска ў мяне забрала сына, сучаснасць, будучыню. (...) Мне здаецца, усё, што адбываецца, гэта страшны сон, ён адбываецца не са мной. Хай Сашу Міністэрства абароны паставіць помнік і напішуць: «Вызваліцелю Печаў». Гэта мой сын адкрыў гэтыя Печы, гэта гіблае месца.

І падчас папярэдняга расследавання, і падчас суду пацярпелая Святлана Коржыч заяўляла, што не згодная з афіцыйнай версіяй таго, што адбылося, жанчына намагае на тым, што яе адзінага сына забілі.

Прысуд не ўвайшоў у законнае дзеянне і можа быць абскарджаны.