Літва ўвяла санкцыі супраць 20 чалавек, якія маюць дачыненне да агрэсіі ў Керчанскай пратоцы
1- 7.12.2018, 20:02
- 9,553
Пра гэта заявіў міністр замежных спраў Літвы Лінас Лінкявічус.
Літва ўвяла нацыянальныя санкцыі супраць 20 чалавек, якія маюць дачыненне да нападу на ўкраінскіх маракоў у раёне Керчанскай пратокі.
Пра гэта заявіў міністр замежных спраў Літвы Лінас Лінкявічус падчас канферэнцыі ў дыпламатычнай акадэміі МЗС Украіны, паведамляе карэспандэнт «Еўрапейскай праўды».
«Мы ўвялі нацыянальныя санкцыі супраць 20 чалавек з асабовага складу, персанальна бралі ўдзел у гэтых вайсковых дзеяннях супраць службоўцаў Вайскова-марскіх сіл Украіны, а таксама іх кіраўнікоў і камандзіраў», - заявіў Лінкявічус.
Санкцыі, між іншым, прадугледжваюць забарону наведваць Літву. Міністр даў зразумець, што сярод асобаў, якія трапілі пад санкцыі, не толькі расейцы.
Літоўскі міністр адзначыў, што толькі асуджэння недастаткова ў адказ на расейскую агрэсію, а іншых крокаў з боку міжнароднай супольнасці пакуль няма.
«Гэта таксама непасрэдна з'яўляецца заклікам да іншых, і іншыя таксама думаюць пра такія захады, я ведаю пра гэта», - дадаў ён.