Ангела Мэркель: Адказнасць за канцлагеры ляжыць на Нямеччыне

Кожны новы ўрад Нямеччыны будзе працягваць гэтую адказнасць несці.

Канцлерка ФРГ Ангела Мэркель заявіла, што гэта Нямеччына нясе адказнасць за ўсё, што адбылося падчас Халакосту ў часы нацыянал-сацыялізму. У інтэрв'ю, апублікаваным на сайце ўрада, канцлерка Нямеччыны пракаментавала польскі Закон аб Інстытуце нацыянальнай памяці. Пра гэта паведамляе «Радыё Польшча».

Са слоў Ангелы Мэркель, яна не мае права «ўмешвацца ў заканадаўства Польшчы», але ўважае, што адказнасць за Халакост ляжыць на яе краіне.

«Гэта былі канцлагеры, адказнасць за якія нясе Нямеччына, гэтая адказнасць захоўваецца, і кожны новы ўрад Нямеччыны будзе працягваць гэтую адказнасць несці», - сказала канцлерка Нямеччыны.

Ангела Мэркель таксама пракаментавала будучы візіт прэм'ер-міністра Польшчы Матэуша Маравецкага ў Нямеччыну, які адбудзецца на наступным тыдні. Канцлерка ФРГ падкрэсліла, што Польшча і Нямеччына стварылі «стабільнае партнёрства», нягледзячы на рознагалоссі, якія ўзнікалі.

Ангела Мэркель таксама выказала надзею, што сустрэча з прэм'ер-міністрам Польшчы пакладзе пачатак «новаму раздзелу» супрацоўніцтва паміж абедзвюма краінамі.