У Віцебску антыкрызісны кіраўнік абакраў сваё прадпрыемства

Кіраўнік збанкрутаванага віцебскага прадпрыемства скраў больш за $7000.

Прызначаны кіраўнік распарадзіўся выплачваць яму заробак, які перавышае дапушчальны ўтрая.

Управа Дэпартамента фінансавых расследаванняў Камітэта дзяржкантролю Віцебскай вобласці распачала крымінальную справу ў дачыненні да кіраўніка паводле справы банкруцтва віцебскага ААТ «Класіка індустрыі моды».

У 2015 годзе эканамічны суд прызнаў гэта некалі буйное горадаўтваральнае прадпрыемства банкрутам і пастанавіў яго ліквідаваць, паведамляе сайт КДК.

Судом быў прызначаны антыкрызісны кіраўнік, у абавязкі якога ўваходзіла выплата заяўленых крэдыторамі патрабаванняў, у тым ліку запазычанасці заробкаў, за кошт продажу маёмасці прадпрыемства-банкрута.

Згодна з дзейным заканадаўствам, за ажыццяўленне сваіх паўнамоцтваў у працэдуры банкруцтва кіраўніку штомесяц па-за чаргой выплачваецца заробак за кошт сродкаў банкрута, зыходзячы з сярэднямесячнага зароку па рэспубліцы.

Аднак антыкрызісны кіраўнік ААТ «КІМ» даваў указанні налічваць яму з лютага да снежня 2017 года заробак, што перавышае дапушчальны ўтрая. Такім чынам ён завалодаў грашыма прадпрыемства на суму больш за 14 тысяч рублёў.

У дачыненні да цяпер ужо былога антыкрызіснага кіраўніка ААТ «КІМ» распачатая крымінальная справа паводле ч. 3 арт. 210 КК (крадзеж шляхам злоўжывання службовымі паўнамоцтвамі).