Усе грошы, выдзеленыя на дарогі Гомельшчыны, выдаткоўваюць на паром на Прыпяці

Адсутнасць аўтамабільных і пешаходных дарог праз Прыпяць спаралізавала жыццё і эканоміку ў рэгіёне.

Паромная пераправа праз Прыпяць павінна запрацаваць 1 сакавіка, піша tut.by. Ёю займаюцца ў РУП «Гомельаўтадар» і рачным параходства. Але - тэрмінова патрэбныя грошы.

- У пачатку сакавіка на два кіламетры вышэй па плыні ўсталюем паромную пераправу - пераабсталяваную баржу. Яе ўжо рыхтуе Пінскі суднабудаўнічы-суднарамонтны завод. Пад'езды да месца ўстаноўкі практычна закончаныя, - распавёў гендырэктар РУП «Гомельаўтадар» Ігар Матвяцоў. - Фінансаваннем займаецца нашая арганізацыя, толькі сродкі заканчваюцца, выканаўцы працуюць за свае грошы, а мы за свае. Катары, на якіх перапраўляюць людзей, запраўляюцца за наш кошт. Усё, што выдаецца на ўтрыманне дарог, накіроўваем на гэтыя працы: купілі метал для пінскага завода, бо і паромная пераправа за наш кошт, закупляем падрадчыку друз, каб ён мог далей працаваць. Але будоўля паволі спыняецца. Трэба тэрмінова адкрываць фінансаванне, бо цяпер пойдуць сур'ёзныя і аб'ёмныя работы. Чакаем абяцанай дапамогі з Менска, але пакуль самі стараемся зрабіць усё, што ў нашых сілах. Альтэрнатывы катарам няма. Ці ехаць у аб'езд, а гэта амаль 300 кіламетраў, што не выйсце.

Раней са спасылкай на «Мостбуд» паведамлялі, што ў сакавіку Прыпяць «будуць перакідаць ў старое рэчышча, аварыйны мост будуць разбіраць цалкам, усе пралёты». З яго «будзе дэмантавацца жалезабетонная бэлька даўжынёй 33 метры, якая пойдзе на завод жалезабетонных канструкцый для правядзення выпрабавання», распавёў гендырэктар ААТ «Мостбуд» Сяргей Вашкевіч. Задача - да 1 студзені 2019 года пусціць аўтамабільным мостам рух.

Цяпер пантонны мост не можа працаваць праз ледастаў. Уначы 14 студзеня праз пахаладанне і ўтварэнне лёду сарвала яго мацаванні. Работы для аднаўлення праводзіліся, але пры мінусавой тэмпературы на паверхні вады з'яўляецца шараш, мост даводзіцца разводзіць. На пераправе задзейнічаныя 2 катары. Адзін ад Мінабароны, іншы ад МНС. З 6 раніцы 15 лютага да 6 гадзін раніцы 16 лютага перавезлі 1 649 чалавек, у тым ліку 50 дзяцей. Адвезлі на другі бераг і 500 кілаграмаў грузу. А з 14 студзеня толькі аднымі супрацоўнікамі МНС перапраўлена 33 240 чалавек, з іх 919 дзяцей. Вага грузу - 28 280 тон.

Пра тое што на аўтамабільным мосце праз Прыпяць у Жыткавічах з'явіліся расколіны і ён правіс, 7 снежня журналістам паведамілі занепакоеныя мясцовыя жыхары. Першапачаткова мост закрылі для аўтатранспарту, а затым і для пешаходаў. Паводле ацэнак спецыялістаў - прыкладна на год. Прычынай разбурэння моста над Прыпяццю маглі стаць яго канструкцыйныя хібы. Адсутнасць аўтамабільных і пешаходных шляхоў праз Прыпяць спаралізавала жыццё і эканоміку ў рэгіёне.