24 чэрвеня 2018, Нядзеля, 17:36
Рубрыкі

На Віцебшчыне работнік банка скраў больш за $150 тысяч

6

Мужчыну выстаўленае абвінавачванне ў махлярстве.

Скончанае расследаванне крымінальнай справы ў дачыненні да кіраўніка аддзела Цэнтра банкаўскіх паслуг аднаго з банкаў у Чашніцкім раёне Віцебскай вобласці, які абвінавачваецца ў махлярстве ў асабліва значнай суме. Падрабязнасці распавялі ва УСК у рэгіёне.

У кастрычніку 2016 года абвінавачаны паводле гэтай справы ўжо быў асуджаны за аналагічнае злачынства на 6 гадоў пазбаўлення волі з канфіскацыяй маёмасці і адбываў пакаранне, калі выявіліся чарговыя злачынныя эпізоды 2013 года. Цяпер яго чакае новы суд.

Паводле звестак следства, з траўня да верасня 2013 38-гадовы кіраўнік аддзела пад падставай атрымання овердрафтных крэдытаў на імя знаёмых неаднаразова завалодваў грашовымі сродкамі банка. Ён з самага пачатку не меў намеру выконваць абавязацельствы для вяртання грошай. Выкарыстоўваючы загадзя ілжывыя дакументы, арганізаваў фармаванне крэдытных дасье, дамоваў тэрміновага банкаўскага дэпазіту ў беларускіх рублях і наступную выдачу сабе гатоўкі ў крэдытах.

Грамадзяне, на якіх былі аформленыя дамовы, даведваліся пра гэта, толькі калі атрымлівалі апавяшчэнні банка аб неабходнасці выплаты крэдыту.

Пацярпелымі ў крымінальнай справе з'яўляюцца 8 чалавек. У сувязі з тым, што яны нібыта не выплачвалі крэдыт, на іх былі накладзеныя абмежаванні: вынесеныя забароны на кіраванне транспартнымі сродкамі і на выезд за межы тэрыторыі Рэспублікі Беларусь і іншыя. Акрамя таго, на кватэры і прыватны дом, зарэгістраваныя на атрымальнікаў і паручыцеляў у крэдыце, накладзеная забарона на адчужэнне.

Мужчыну выстаўленае абвінавачванне ў махлярстве, учыненае паўторна, групай асоб, у асабліва значнай суме ў дзевяці эпізодах супрацьпраўных дзеянняў. Агульная сума, атрыманая абвінавачаным ашуканскім шляхам, - больш за 314 тысяч рублёў.

Паводле крымінальнай справы канфіскаваныя і даследаваныя банкаўскія дакументы ва ўсіх овердрафтных крэдытах, далучаныя высновы больш чым трыццаці судова-почырказнаўчых экспэртыз, кампенсаваная шкода на суму больш за 86 тысяч рублёў. Матэрыялы крымінальнай справы склалі 20 тамоў.

Кіраўніцтву банка накіраванае прадстаўленне аб выяўленых прычынах і ўмовах, якія спрыялі ўчыненню злачынстваў. Пасля разгляду прадстаўлення 4 службовыя асобы і супрацоўніка банка звольненыя, 4 прыцягнутыя да дысцыплінарнай і матэрыяльнай адказнасці.