Мытнікі канфіскавалі ў беларуса $20 тысяч
11- 21.02.2018, 11:23
- 21,034
Маладзён ехаў з Літвы праз «Прывалку».
25-гадовы беларус ехаў з Літвы праз «Прывалку» на сваім Mercedes. Для праходжання мяжы абраў «зялёны» калідор. Аднак падчас мытнага кантролю ў яго знайшлі грошы рознага наміналу, сума якіх у эквіваленце склала больш чым $30 000. Гэта амаль утрая перавышае дапушчальны максімум, дазволены заканадаўствам ЕАЭС для правозу без пісьмовага дэкларавання, паведамляе прэс-служба Гарадзенскай мытні.
Пры адначасовым увозе альбо вывазе грашовых сродкаў і (або) дарожных чэкаў на агульную суму, якая перавышае ў эквіваленце 10 тысяч даляраў ЗША, яны падлягаюць дэклараванню ў пісьмовай форме шляхам падачы дэкларацыі на ўсю суму грашовых сродкаў пры ўвозе, нагадвае Гарадзенская рэгіянальная мытня.
- Дык як сума незадэклараваных грашовых сродкаў значна перавысіла парог, устаноўлены крымінальным заканадаўствам, Гарадзенскай рэгіянальнай мытняй распачатая крымінальная справа ў адпаведнасці з часткай 2 артыкула 228 КК РБ, - гаворыцца ў паведамленні мытнікаў.
Суд Гарадзенскага раёна вынес прысуд, згодна з якім за кантрабанду грашовых сродкаў мужчына павінен выплаціць штраф сумай 500 базавых адзінак. Грашовыя сродкі ў частцы перавышэння (а гэта ў эквіваленце больш як $20 000) канфіскаваныя.