Пратэстовец у Берасці: Я дзіцяці паабяцаў, што заводу не будзе, таму я тут
4- 20.03.2018, 12:25
- 11,771
Чаму людзі выходзяць на цэнтральную плошчу супраць акумулятарнага завода.
У нядзелю, 18 сакавіка апаненты будаўніцтва акумулятарнага завода чарговым разам сабраліся на плошчы Леніна ў Берасці «карміць галубоў». Такім чынам жыхары Берасця пратэстуюць супраць будаўніцтва ў санітарнай зоне Берасця шкоднай вытворчасці, паведамляе «Берасцейская вясна».
Кармленне галубоў скончылася песняй «Жыць», якую берасцейцы напярэдадні адмыслова напісалі і зрабілі відэакліп, каб улады адчулі адказнасць за свае дзеянні.
На плошчы можна было паслухаць меркаванне гараджан:
«Яны (улады) кажуць, што не чакалі, што ў Берасці столькі пісьменных людзей, якія могуць ім (уладам) уцерці нос».
«Мы б ім (уладам) паверылі, што яны пабудуюць свае дамы побач з заводам. Чаго ж яны ўсё з'язджаюць, прадаюць маёмасць і ўцякаюць».
«Мая дачка з садка прыйшла і пра шкодны завод, ад якога дзеці захварэюць, расказвае. Я дзіцяці паабяцаў, што заводу не будзе, таму я тут».
«Я быў на 5-гадзінны сустрэчы ў аблвыканкаме ў пятніцу, яны не адказалі ні на адно пытанне!»
Відаць, што нягледзячы на абяцанні ўладаў разабрацца, уладам ніхто не верыць і расслабляцца не збіраецца.
Напрыканцы берасцейцы праскандавалі «Не заводу!»