Раман Кісляк: Барацьба прадаўжаецца

На адкрытае пасяджэнне суда аб справе акумулятарнага заводу прыйшло больш за 100 чалавек.

У судзе Маскоўскага раёна Берасця ў сераду прадаўжаецца працэс аб справе будаўніцтва акумулятарнага завода, піша «Брестская газета». Судовае слуханне доўжылася 8 гадзін. Пастанова аб справе прыпынення будаўніцтва акумулятарнага завода будзе вынесеная 27 сакавіка.

Учора разглядаўся пазоў аб прыпыненні гаспадарчай дзейнасці ТАА «АйПаўэр» да правядзення паўторных грамадскіх слуханняў аб будаўніцтве прадпрыемства. Адказнікі гэты пазоў не прызналі. Папярэдняе слуханне паводле справы прайшло 27 лютага.

На адкрытае пасяджэнне суда прыйшло больш за 100 чалавек. Зала, прызначаная для правядзення слуханні, не змясціла ўсіх ахвотных. Пасяджэнне перанеслі ў самую вялікую залу №30. Але і там прысутныя занялі не толькі месцы для сядзення, але і размясціліся стоячы па перыметры.

У пачатку паседжання суддзя Аляксей Карагода папрасіў выйсці тых, хто не змог прысесці, патлумачыўшы гэта патрабаванні правіл пажарнай бяспекі. Людзі пачалі абурацца маленькімі памерамі памяшкання, якое было выдадзенае для слухання такой рэзананснай справы. Але затым тыя, хто стаялі прыселі на кукішкі, і пасяджэнне пачалося. Каб у перапоўненай зале людзей не стала яшчэ больш, яе замкнулі.

У якасці пазоўніка выступала грамадскае аб'яднанне «Экадом», актывісты Дзям'ян Лепясевіч, Алена Макарэвіч і Зміцер Бекалюк.

У якасці адказчыка - ТАА «АйПаўэр». Яшчэ адным адказчыкам быў Берасцейскі райвыканкам.

Суддзя адхіліў хадайніцтва пазоўнікаў аб дазволе на фота- і відэаздымку, а таксама жывую трансляцыю праз тое, што «працэс складаны, трэба шмат працаваць, працаваць засяроджана, і людзі могуць хвалявацца, збівацца».

Як паведаміў падчас перапынку праваабаронца Раман Кісляк, 15 чалавек напісалі скаргу ў абласны суд на тое, што не была забяспечаная публічнасць працэсу.

Таксама былі адхіленыя хадайніцтвы пазоўнікаў аб выдачы для разгляду цэлага спісу дакументаў аб будаўніцтве акумулятарнага завода. Сярод іх інвестыцыйная дамова, выснова Дзяржбудэкспэртызы ды іншыя. Адвакат - прадстаўнік кампаніі «АйПаўэр» на кожнае з хадайніцтваў адказвала практычна адно і тое ж: «Прадметам гэтага судовага паседжання з'яўляецца прыпыненне будаўніцтва ў сувязі, на думку пазоўнікаў, з парушэннем права грамадскасці на правядзенне грамадскіх абмеркаванняў. То хадайніцтва, якое заяўлена, выходзіць за межы заяўленых патрабаванняў. <...> Гэтыя дакументы не маюць дачынення да працэдуры правядзення грамадскага абмеркавання».

Хадайніцтва аб выкліку ў якасці сведкі галоўнага санітарнага лекара горада таксама было адхіленае.

Прадстаўнікі пазоўніка хацелі, каб ім былі пададзеныя зыходныя звесткі, паводле якіх вызначалася ацэнка ўздзеяння на навакольнае асяроддзе (АУНА), якая рабілася для грамадскіх слуханняў. Але прадстаўніца «АйПаўэра» ў сваю чаргу заявіла, што тое, што пазоўнікі не ведалі аб грамадскіх слуханнях, не з'яўляецца падставай для правядзення паўторных слуханняў. Патрабаванні пазоўнікаў яна ўважае за незаконныя і таму папрасіла адмовіць у задавальненні пазову.

«Усё было даследавана, судовае следства, спрэчкі, рэплікі - усё гэта скончылася. Суд пайшоў для вынясення пастановы аб справе да 27 сакавіка. Я не прыхільнік апярэджваць пастанову суда. Нават калі будзе пастанова не на карысць пазоўнікаў, яны могуць абскардзіць гэтую заяву, - паведаміў па выніках васьмігадзіннага судовага слухання праваабаронца Раман Кісляк. - Мы даведаліся некаторыя новыя моманты, якія растлумачваюць сітуацыю з будаўніцтвам завода, з падрыхтоўкай, з правядзеннем грамадскіх слуханняў. Так, высветлілася, што існуюць тры тэксты АУНА. Трэці - самы пашыраны - і быў пададзены наогул у 2018 годзе, як я разумею. Гэта значыць пасля таго, як пайшоў рэзананс у Берасці і Берасцейскім раёне. Яны падалі пашыраны АУНА, разумеючы, што тое, што яны прадставілі першапачаткова, - гэта дакумент, які не вытрымлівае ніякай крытыкі. Адно ясна: вельмі шмат парушэнняў і барацьба прадоўжыцца».

Нагадаем, ініцыятыўныя групы супраць будаўніцтва акумулятарнага завода ў СЭЗ, заручыўшыся падтрымкай у выглядзе подпісаў больш за 36 тысяч жыхароў Берасця і раёна, дамагаюцца прыпынення будаўніцтва завода АКБ. На іх думку, гэта вытворчасць з'яўляецца патэнцыйна небяспечнай для экалогіі і здароўя жыхароў і не павінна весціся побач з абласным цэнтрам.