Аляксандр Глеб: Сезон 2018 стане для мяне заключным у кар'еры

Зорны футбаліст заявіў, што хоча завяршыць кар'еру на прыгожай ноце.

Паўабаронца БАТЭ Аляксандр Глеб заявіў, што цяперашні сезон стане апошнім у яго кар'еры.

- Сезон 2018 стане для мяне заключным у кар'еры. Вельмі хачу завяршыць яе на прыгожай ноце: заваяваць з БАТЭ нацыянальныя трафеі, прабіцца ў групавую стадыю еўракубкаў і дапамагчы камандзе, калі галоўны трэнер будзе зацікаўлены ў маіх паслугах.

- Гэта значыць матывацыі ў цябе ў дастатку.

- Так. Тым не менш у «Крылах Саветаў», дзе выступаў да лета мінулага года, не ўсё атрымалася - адчуваю пэўную недаказанасць.

- Ты не выходзіў на поле ў афіцыйных матчах амаль дзесяць месяцаў. Наколькі гэта з'яўляецца праблемай?

- У любым выпадку, я падтрымліваў форму. Зразумела, што гульнявога тонусу цяпер няма. Думаю, даволі хутка набяру належныя кандыцыі. Лішняй вагі няма - трэба проста ўвайсці ў рытм. Ну а майстэрства, спадзяюся, засталося на ранейшым узроўні.

- Ты знаёмы з новым галоўным трэнерам «жоўта-сініх» Алегам Дулубам.

- Цікавасць у супрацоўніцтве з яго боку стала асноўнай прычынай майго рашэння вярнуцца ў БАТЭ. Стэлефанаваліся, пагаварылі. І працэс зрушыўся з месца.

- 1 траўня табе споўніцца 37 гадоў. Узрост адчуваеш?

- Як вы ведаеце, у мяне была даволі доўгая паўза ў выступах. Вельмі засумаваў па футболе. Думаю, гэтыя эмоцыі нададуць сіл - і нават у 37 змагу рэальна дапамагчы БАТЭ ў выкананні пастаўленых задач.

- Наогул шкадуеш, што дзесяць месяцаў знаходзіўся па-за футболам?

- Не, шчыра скажу. У мяне нарадзілася дзіця, якому надаваў увесь час. Вядома, узнікалі пэўныя варыянты з клубамі, але да падпісання кантракту справа не даходзіла. Нічога страшнага, - цытуе Глеба афіцыйны сайт БАТЭ.