Што будзе з коштамі на цукар у Беларусі?

Улады не дадуць панізіць кошт.

У барацьбе ўладаў з павышэннем коштаў, якая нам тлумачыцца выключна інтарэсамі грамадзян, ёсць некалькі прыкрых выключэнняў, якія псуюць агульную дабратворную карціну абароны працоўных ад падступных бізнэсоўцаў, якія спрабуюць зняць з іх апошнюю кашулю, піша «Экономическая газета».

У першую чаргу тут ўспамінаюцца кошты на моцны алкаголь, мінімальныя кошты на які рэгулююцца дзяржавай і перыядычна (а калі быць больш дакладнымі - стала) павялічваюцца. Натуральна, прычынай гэтага называецца не неабходнасць папаўнення бюджэту, а барацьба за здароўе жыхароў Беларусі. Алкагалізацыя насельніцтва, несумненна, рэч небяспечная і змагацца з ёй трэба ўсімі даступнымі сродкамі.

Але вось з усталяваннем мінімальнага кошту на цукар такі нумар не праходзіць. Яго празмернасць у суседніх краінах прывяла да таго, што плынь таннай расейскай «белай смерці» на нейкі час проста засыпала прылаўкі нашых крам. Але жыхары Беларусі, за выключэннем найбольш шустрых, і парадавацца гэтаму факту толкам не паспелі, як з'явілася пастанова МАРГ ад 2017/12/04 №60 «Аб усталяванні лімітавых мінімальных коштаў на цукар белы крышталічны» (далей - пастанова №60), якая ўвайшла ў дзеянне з 17 студзеня 2018 г., якой была вызначаная ніжняя «планка» раздробнага кошту цукру белага крышталічнага (з ПДВ) - 1,5 BYN. Пры гэтым тэрмін дзеяння гэтага дакумента ў адпаведнасці з правіламі, усталяванымі ў Еўразійскім эканамічным саюзе (ЕАЭС), быў абмежаваны 90 днямі.

Тры месяцы праляцелі непрыкметна, і, вядома, сітуацыя з цукрам на сусветных рынках за гэты час не «рассмакталася». Таму для абароны інтарэсаў беларускіх цукравытворцаў, якія відавочна прайгралі канкурэнтную барацьбу з калегамі з сумежных краін, да пытання, што рабіць з коштамі на яго, давялося вяртацца. Але на гэты раз спатрэбілася ўносіць змены адразу ў два дакументы, якія рэгулююць кошты.

Па-першае, пастанова Саўміна ад 2014/01/17 №35 «Аб зацвярджэнні пераліку сацыяльна значных тавараў (паслуг), кошты (тарыфы) на якія рэгулююцца дзяржаўнымі органамі, і прызнанні страціўшымі дзеянне некаторых пастаноў Савета Міністраў Рэспублікі Беларусь» дапоўнена п. 11, згодна з якім МАРГ атрымаў права працягваць тэрмін дзяржаўнага коштавага рэгулявання на тавары, уключаныя ў пералік сацыяльна значных тавараў, кошты на якія яно рэгулюе не больш за 90 дзён на працягу аднаго года, пры наяўнасці ўзгаднення Еўразійскай эканамічнай камісіі.

Па-другое, змяненне ўнесена і ў саму пастанову №60: гранічныя мінімальныя кошты на цукар белы крышталічны (раздробны - сумаю ўсё тыя ж паўтара рубля) цяпер дзейнічаюць не 90, а 180 дзён, г.зн. да 16 ліпеня 2018 г.