Пашынян: Перамога рэвалюцыі блізкая, да развязкі - некалькі дзён
6- 20.04.2018, 14:55
- 16,747
Лідар народных пратэстаў назваў магчымы дзень змены ўлады ў Арменіі.
Лідар партыі «Грамадзянская дамова» Нікол Пашынян падчас пратэстнага шэсця распавёў журналістам аб магчымым сцэнары развіцця «аксамітнай» рэвалюцыі ў Арменіі, паведамляе newsarmenia.am.
«Мы абмяркоўваем магчымыя сцэнары развіцця падзей і не выключаем, што «аксамітная» рэвалюцыя можа дасягнуць свайго лагічнага заканчэння найбліжэйшымі днямі», - сказаў Пашынян журналістам падчас шэсця ў пятніцу.
Пры гэтым ён не выключыў, што «днём змены ўлады ў краіне» можа стаць 24 красавiка - Дзень памінання ахвяр генацыду армян 1915 года ў Асманскай Імперыі.
«24 красавіка мы сапраўды плануем пайсці ў Цыцэрнакаберд і аддаць даніну памяці ахвярам генацыду армян. Можна меркаваць, што менавіта гэты дзень і стане днём змены ўлады ў краіне. Мы цяпер абмяркоўваем і гэты сцэнар», - заявіў Пашынян.
Пры гэтым апазіцыянер адзначыў, што аб далейшых кроках руху ён абвесціць падчас сённяшняга мітынгу на плошчы Рэспублікі, які адбудзецца а 19:00.
Каментуючы сваю магчымую ролю ў сістэме новай улады Арменіі ў выпадку поспеху «аксамітнай рэвалюцыі» і ягонага магчымага прэм'ерства Пашынян заявіў, што ён не мае права развязваць такія пытанні.
«Такія пытанні павінен разглядаць народ. Калі ў далейшым народ ускладзе на мяне той ці іншы цяжар адказнасці, то мне нічога не застанецца, акрамя як выконваць ускладзеныя на мяне абавязацельствы», - заявіў Пашынян.
Карэспандэнт «Радыё Азатуцюн», напрыклад, пацікавіўся ў апазіцыйнага дэпутата, які ўзначаліў вулічныя пратэсты супраць прэм'ерства Сержа Саргсяна, ці бачыць ён сябе на пасадзе прэм'ер-міністра.
- Вы заявілі аб стварэнні рэвалюцыйнага камітэта, калі адбудзецца змена ўлады, гэтая структура прыйдзе да ўлады?
- Гэта вызначыць народ на плошчы Рэспублікі.
- Вы бачыце сябе на пасадзе прэм'ер-міністра?
- Я не магу рабіць такія заявы, бо наша задача - давесці аксамітную рэвалюцыю да лагічнага заканчэння. Калі народ пакладзе на мяне якую-небудзь адказнасць, ...я адказнасці не пазбягаю.
- Спадар Пашынян, развязка - гэта пытанне некалькіх дзён?
- Паводле аналізаў даволі сур'ёзных аналітыкаў, якія ўчора папрасілі аб сустрэчы, гэта пытанне дзён, я ўстрымаюся ад ўказання тэрмінаў, але я мяркую, што гэтая хваля распаўсюджваецца і перамога вельмі блізкая.
З 13-га красавіка лідар апазіцыйнай парламенцкай фракцыі «Елк», кіраўнік партыі «Грамадзянская дамова» Нікол Пашынян праводзіў у цэнтры Ерэвана кругласутачныя мітынгі супраць прэм'ерства Сержа Саргсяна, якія з 16-га красавіка выліліся ў агульнагарадскія акцыі грамадзянскага непадпарадкавання. Пратэсты суправаджаюцца сутыкненнямі з сіламі правапарадку, напрыклад, на праспекце Баграмяна, блакаваннем вуліц і ключавых магістраляў, а таксама будынкаў дзяржустаноў.