«Маці 328» з Ліды: Адкрылася другое дыханне
1- 17.05.2018, 9:40
- 10,226
Мясцовыя ўлады занерваваліся праз упартасць актывістак-галадоўніц.
У Лідзе шосты дзень працягваюць галадаць дзве актывісткі руху «Маці 328» - Людміла Лапко і Алена Мікалаюк. Учора прадстаўнікі райвыканкама пацікавіліся станам здароўя адной з іх, Людмілы Лапко, паведамляе «Радыё Свабода».
Людміла Лапко галадае ў сваім доме, яна ў адпачынку і не ходзіць на працу. Учора, са слоў Лапко, да яе патэлефанаваў намеснік старшыні райвыканкама Віктар Пранюк і пацікавіўся здароўем, сказаў, што да яе прыйдзе доктар.
«Сапраўды, пазней прыйшоў лекар з гарадской лякарні і ўчастковы лекар. Паслухалі мяне, выпісалі лекі, і заўтра я пайду ў лякарню, каб мне зрабілі кардыяграму. Я асабліва ні на што не скардзілася, але яны ўзялі з мяне абяцанне, што буду выконваць іх загады», - сказала Лапко.
Званком з райвыканкама Лапко была здзіўленая, бо яшчэ раніцай казала, што ніхто з уладаў не звяртае на яе праблемы увагі. Дадала, што Пранюк абяцаў запісаць яе на прыём да «дэпутата палаты прадстаўнікоў»: маўляў, вам нічога самой не трэба рабіць.
Другая галадоўніца, Алена Мікалаюк, прадаўжае штодня хадзіць на працу. Да яе ніхто з райвыканкама не тэлефанаваў, і па медыцынскую дапамогу яна не звярталася.
«Я пакуль сама прытрымліваюся ўсіх рэкамендацый, якія трэба выконваць падчас галадоўкі, і сёння нават стала лепш, нібы адкрылася другое дыханне», - сказала Нікалаюк.
Наконт спынення галадоўкі абедзве жанчыны пакуль не вызначыліся. Але, з іхніх слоў, у чацвер 17 траўня, магчыма, будзе прынятая нейкая пастанова.