Прафзвяз РЭП стаў на абарону работнікаў гомельскага казіно

Адразу дзевяць чалавек уступілі ў незалежны прафзвяз.

Адразу 9 работнікаў гомельскага казіно «У Адмірала» прыйшлі ўчора ў рэгіянальнае аддзяленне прафзвязу работнікаў радыёэлектроннай прамысловасці (РЭП) па дапамогу, паведамляе гомельская «Весна».

Казіно «У Адмірала», якое размяшчалася ў будынку гатэля «Турыст», з 20 траўня абвясціла аб сваёй ліквідацыі. Працаўнікі скардзяцца, што іх начальства не папярэдзіла, як таго патрабуе закон за два месяцы аб ліквідацыі, не сплаціла належнай 3-х месячнай дапамогі і акрамя таго, нават заробак за красавік і травень адмаўляецца выплачваць.

- Затрымкі заробку былі апошнім часам рэгулярнымі, - распавялі на прыёме ў прававога інспектара працы РЭП Леаніда Судаленкі супрацоўнікі. - Гендырэктарка Таццяна Міхалюк тлумачыла іх неабходнасцю аплаты арэнды і падаткаў. Але цяпер усё сур'ёзна - нам павінны за красавік і травень. А 20 траўня дырэктарка нас сабрала і паведаміла, што 18 траўня казіно падало заяўку на банкруцтва. Маўляў, у прадпрыемства завінавачанасць за арэнду. Нам настойліва прапанавалі звольніцца на ўласнае жаданне і забраць працоўныя кніжкі.

У былых супрацоўнікаў казіно некалькі прэтэнзій: не ў час паставілі перад фактам, не сплацілі завінавачанасць у заробку, не выплацілі дапамогу пры звальненні. Агульную суму назваць не гатовыя - кажуць, што пры грубым падліку кожнаму павінны блізу 2 тысяч рублёў. Колькасць пацярпелых - звыш 50 чалавек (большасць звольніліся самі, пагадзіўшыся з прапановай Міхалюк).

Што паслужыла прычынай пазыковай ямы, людзі сказаць пакуль не могуць. З інфармацыі журналістаў, уласнік закрывае аналагічнае казіно і ў Менску:

- Грошы кудысьці сышлі. Відавочна мы не збанкрутавалі, выплаціўшы якому-небудзь гульцу выйгрыш: сёння ты выйграў у казіно - заўтра абавязкова прайграеш. Кліентаў стала крыху менш - так. Але яшчэ больш упалі абароты, таму што людзі пайшлі больш сціплыя. А дзе ранейшыя? Хтосьці сядзіць. Хтосьці сышоў у іншыя казіно, якія значна багацейшыя, - у нас нічога ў развіццё не ўкладвалася. Мы даўно працавалі ў рэжыме эканоміі.

З дапамогай прафзвязнага юрыста былыя супрацоўнікі казіно падалі ў суд пазовы.