Павал Севярынец пра паход у Мінкульт: Чыноўнікі баяцца, што ўсплывуць карупцыйныя схемы

Палітык апавёў пра вынікі паходу ў Міністэрства культуры.

Абаронцаў Курапатаў запрасілі ў Міністэрства культуры раніцай 20 чэрвеня, каб абмеркаваць сітуацыю з адкрыццём рэстарана «Поедем поедим» за 50 метраў ад месца пахавання дзясяткаў тысячаў забітых падчас сталінскіх рэпрэсій. Але ў Мінкульце абаронцы «адчулі бюракратычны лёд», апавёў «Радыё Свабода» адзін з лідараў БХД Павал Севярынец.

«Чыноўнікі разгубленыя, яны не ведаюць, што рабіць, – заявіў адзін з лідараў пратэстаў Павел Севярынец журналістам паводле вынікаў сустрэчы. – Аляксандр Яцко, намеснік міністра, нічога ў фактах не сказаў, ці будзе рабіць Міністэрства культуры нешта ў сітуацыі з Курапатамі».

Астатнія прысутныя на сустрэчы – у тым ліку Ганна Шапуцька і Уладзімір Раманоўскі – пагадзіліся з пазіцыяй сустаршыні Беларускай хрысціянскай дэмакратыі.

На думку Севярынца, абаронцаў выклікалі ў міністэрства, проста каб «паказаць, што яны нейкім чынам удзельнічаюць», але на самай справе толькі спасылаліся на бюракратычныя працэдуры і юрыдычныя дэталі. На ягоную думку, чыноўнікі «адчуваюць адказнасць за карупцыйную схему, праведзеную праз Міністэрства культуры, і баяцца, што гэта ўсё выплыве», бо чыноўнікі «не бясплатна дазваляюць рэзаць ахоўныя зоны і будаваць там аб'екты».

Таксама ад Мінкульта не пачулі нічога пра дзяржаўны конкурс для помніку ў Курапатах.

Севярынец адзначыў, што прадстаўнікі Міністэрства культуры фактычна маўчаць – не даюць ацэнак сітуацыі, хоць пра канфлікт у Курапатах выказаліся дзеячы культуры з усяго свету. Намеснік міністра размаўляў з абаронцамі Курапатаў па-расейску, зазначыў палітык.

Абаронцы Курапатаў прапанавалі Мінкульту забараніць працу рэстарана і вярнуцца да ахоўных зонаў мэмарыялу Курапатаў узору 2003 года (звужаных пасля пачатку будаўніцтва «Бульбаш-хола» ў межах ахоўнай зоны). Але, кажа Севярынец, пастанова наўрад ці прымаецца ў Мінкульце – хутчэй за ўсё, пастанаўляць будзе асабіста Лукашэнкі, таму спаборнікам рэстарана «трэба напружыцца».