У Докшыцкім раёне калгас заплаціць за распрацоўку праекта аграсядзібы больш за $110 тысяч

Аграсядзібу збіраюцца пабудаваць на беразе штучнай сажалкі ў сярэднім цячэнні ракі Мажанкі.

Управа капітальнага будаўніцтва Докшыцкага раёна абвясціла тэндэр на распрацоўку праектнай, у тым ліку каштарыснай дакументацыі і выкананне пошукавых работ для комплексу аграэкатурызму ў вёсцы Маргавіцы, піша vitebsk.cc.

Новую аграсядзібу збіраюцца пабудаваць на беразе штучнай сажалкі ў сярэднім цячэнні ракі Мажанкі. Тут плануецца ўзвесці гасцявы дом на шэсць пакояў з кухняй-сталоўкай, лазню, склеп, а таксама правесці рэканструкцыю сажалкі - уладкаваць на ёй прычал, земляную плаціну і вадаскід.

Заказчыкам будаўніцтва з'яўляецца адкрытае акцыянернае таварыства «Бягомльскі». Гэта сельгаспрадпрыемства функцыянуе з 2017 года, асноўным тыпам яго дзейнасці з'яўляецца жывёлагадоўля мяса-малочнага кірунку і вырошчванне збожжа. Акцыі ААТ «Бягомльскі» належаць Докшыцкаму раёну і перададзены ў кіраванне ўправе сельскай гаспадаркі і харчавання Докшыцкага раённага выканаўчага камітэта.

Паводле дакументацыі тэндэру арыенціровачны кошт распрацоўкі праектнай і каштарыснай дакументацыі, а таксама пошукавых работ складае 220 740 рублёў. Фінансуецца закупка з уласных сродкаў. На выкананне работ адводзіцца тры месяцы, пакет дакументаў павінен быць гатовы да канца кастрычніка.