У «Новай Гуце» пабіты трохгадовы рэкорд у прапусканні праз мяжу

Толькі ў суботу было прапушчана больш за 13 тысяч чалавек.

У выхадныя дні ў кантрольным пункце «Новая Гута» чарга з легкавікоў нагадвала гіганцкую змяю. А прыкладна з 15 гадзін 30 хвілін у чарзе турыстычных аўтобусаў было не менш чым 30 транспартных сродкаў, піша сайт gomel.today.

Толькі за 14 ліпеня, паводле звестак Гомельскай памежнай групы, праз Дзяржаўную мяжу было прапушчана больш за 13 тысяч чалавек. Гэта пры тым, што прапускная здольнасць пункта - 5 200 чалавек на дзень. Такім чынам, быў пабіты трохгадовы рэкорд гэтага пункта.

Улетку «Новая Гута» традыцыйна карыстаецца попытам у турыстаў, якія выязджаюць на адпачынак ва Украіну. Найбольшая колькасць легкавога транспарту, турыстычных і рэйсавых аўтобусаў прыбывае ў пункт для выезду з тэрыторыі ЕАЭС у другой палове дня і ў суботы-нядзелі.

З мэтай скарачэння чэргаў на мяжы гомельская мытня на перыяд адпачынкаў максімальна павялічыла колькасць службовых асоб, якiя ажыццяўляюць мытныя аперацыі.

Напярэдадні адпачынкаў памежнікі і мытнікі заклікаюць грамадзян сачыць за сітуацыяй у кантрольных пунктах. Зрабіць гэта можна з дапамогай сайту Дзяржаўнага памежнага камітэту gpk.gov.by ў раздзеле «Чэргі на мяжы». У выпадку збою аўтамабіляў у канкрэтным пункце, напрыклад, Новай Гуце, можна выбраць іншы пункт для пераезду мытнай мяжы - Камарын, Весялоўку, Новую Рудню, Аляксандраўку, Глушкевічы.

Таксама, збіраючыся за мяжу, у Гомельскай мытні раяць вывучыць заканадаўства, якое тычыцца перамяшчэння тавараў праз мытную мяжу ЕАЭС, у тым ліку вывучыць мытнае заканадаўства краіны, у якой плануецца адпачынак.