Чаму затрымалі галоўнага лекара Менскай абласной бальніцы

20 чэрвеня галоўнага лекара Андрэя Каралько супрацоўнікі ў цывільным вывелі з працоўнага кабінета, пасадзілі ў аўтамабіль і павезлі.

З таго часу ў бальніцы лекар больш не з'явіўся, а сілавыя ведамствы яго затрыманне не каментуюць.

- Андрэй Сцяпанавіч - лекар ад Бога, ніколі нікому не адмаўляў у дапамозе, і нават перабраўшыся ў Менск, заўсёды памятаў пра землякоў, не адварочваўся ад іх, - расказваюць жыхары Старых Дарог.

У невялікім гарадку затрыманне галоўнага лекара Менскай абласной бальніцы - тэма №1 для абмеркавання. 38-гадовы Андрэй Каралько родам з вёскі Будзенічы Старадарожскага раёна. Скончыўшы медыцынскі ўніверсітэт з чырвоным дыпломам, прыехаў працаваць на радзіму. Пачынаў з пасады хірурга-траўматолага, затым узначаліў Капыльскую раённую бальніцу, а з 2013 года - Менскую абласную.

20 чэрвеня Андрэя Каралько затрымалі прама на працоўным месцы.

- Гэта няпраўда, што яго выводзілі ў кайданках. Прыйшлі людзі ў цывільным, правялі ператрус у кабінеце, а затым Андрэя вывелі, пасадзілі ў аўто - і ўсё, - распавядае tut.by Уладзімір, сябар Андрэя Каралько. - Мы кожны дзень размаўлялі па вайберу, як раз 20 чэрвеня я быў на планавым абследаванні, напісаў яму: у шпіталі бачныя дзіўныя змены, адчуваецца рука гаспадара. Андрэй не адказаў. Затым прыйшла загадчыца аддзялення, паведаміла, што ён затрыманы. Андрэй жыў бальніцай. Пры ім яна сапраўды змянілася дзякуючы яго дзелавым якасцям. Дзе яшчэ ёсць тры апарата МРТ? У святле апошніх падзей (масавыя затрыманні ў сістэме аховы здароўя. - Заўвага.), мабыць, справа тычыцца закупак.

Як адзначае Уладзімір, затрыманне галоўнага лекара для ўсіх у ягоным атачэнні стала нечаканасцю. У лютым гэтага года Каралько быў абраны дэпутатам абласнога савета, «яго не маглі не правяраць».

- Андрэя падазраюць у перавышэнні службовых паўнамоцтваў, па маёй інфармацыі, пра хабар гаворка не ідзе. Для яго грошы ніколі не былі прыярытэтам. Адзін час Андрэй працаваў траўматолагам у хакейным «Дынама», заробак быў вельмі высокі, але ён наважыў вярнуцца ў медыцыну. Гэты чалавек сам сябе зрабіў, маці - звычайная працаўніца вёскі, бацька памёр, усяго ў жыцці Андрэй дамогся сам, - кажа Уладзімір.

Праваахоўныя органы нават праз два тыдні пасля затрымання Каралько крымінальную справу не каментуюць. Паводле закона, на працягу 10 дзён чалавеку павінна быць выстаўленае абвінавачанне ці яго абавязаны адпусціць. На якой падставе галоўны лекар узяты пад варту, невядома.

- Следчы камітэт цяпер не мае звестак аб затрыманні, - каментуе Сяргей Кабаковіч, начальнік аддзела інфармацыі і сувязі з грамадскасцю СК.

З 4 ліпеня абавязкі галоўнага лекара Менскай абласной клінічнай бальніцы выконвае Валерый Усніч, які дагэтуль быў намеснікам галоўнага лекара медыцынскай часткі.

- У мяне ніякай інфармацыі няма, - адказаў Валерый Усніч на просьбу пракаментаваць крымінальную справу Каралько.

Нагадаем, 25 чэрвеня старшыня КДБ Валерый Вакульчык паведаміў пра тое, што камітэт выявіў маштабную карупцыйную схему ў сферы аховы здароўя Беларусі, затрымана 33 чалавекі. У іх ліку - дырэктар цэнтра экспертыз і выпрабаванняў у ахове здароўя Аляксандр Сталяроў, за развязанне пытанняў па дзяржаўнай рэгістрацыі лекаў; дырэктар прадпрыемства «Белмедтэхніка» Аляксандр Шарак - за арганізацыю ўкладання і выкананне дамоў, забеспячэнне своечасовай аплаты і рэалізацыі закупак.

- Дарэчы, падчас ператрусу ў яго гаражы ў тайніку выяўлена больш за $620 тысяч у эквіваленце, - паінфармаваў Валерый Вакульчык.

Акрамя таго, затрыманыя шэраг службовых асоб «Белмедтэхніка», якія ўдзельнічалі ў арганізацыі працы камісіі Міністэрства аховы здароўя па закупцы абсталявання і забеспячэнню своечасовай аплаты паставак. У некаторых выпадках сума хабараў даходзіла да 350 тысяч даляраў. Імя Андрэя Каралько ў афіцыйных паведамленнях не фігуравала.

Журналісты пацікавіліся ў віцэ-прэм'ера Васіля Жарко, які шмат гадоў быў міністрам аховы здароўя, як ён мог не ведаць аб маштабнай карупцыйнай схеме.

- Калі б ведаў, то меры былі б прынятыя ўжо тады (калі Васіль Жарко быў міністрам. - Заўвага.), - заявіў віцэ-прэм'ер. - Мы сапраўды кантралявалі сітуацыю тады, закупкі гэта няпростае пытанне. Дзень свой працоўны пачыналі з закупак і завяршалі закупкамі. Калі дзесьці мы нешта адчувалі, то адразу прымалі меры да вінаватых - аж да вызвалення ад пасадаў. Але што такая справа вырасце, я проста не чакаў.