Эрдаган пачаў масавую «чыстку» дзяржапарату

Больш за ўсё звольненых - у МУС і войску.

Урад Турцыі абвясціў пра найбуйнейшыя за апошні час масавыя звальненні дзяржслужбоўцаў: розныя дзяржаўныя структуры павінны пакінуць больш за 18 тысяч чалавек, паведамляе агенцтва Anadolu.

Адпаведны дэкрэт урада апублікаваны ў выданні Resmi Gazet - афіцыйным весніку кабінета міністраў краіны. Дэкрэт мае сілу закона, бо ў краіне дагэтуль дзейнічае рэжым надзвычайнага становішча, уведзены пасля спробы дзяржаўнага перавароту ў ліпені 2016 года.

Пра чарговую, самую масавую за апошні час чыстку дзяржапарату, улады абвясцілі напярэдадні інаўгурацыі на новы тэрмін прэзідэнта Рэджэпа Эрдагана, які перамог на прэзідэнцкіх выбарах у чэрвені 2018 года.

Усяго пад скарачэнне трапілі 18 632 чалавекі, спыненая дзейнасць 12 няўрадавых арганізацый, трох газет і аднаго тэлеканалу.

Самай масавай чыстцы падпала МУС: звольненыя 8998 супрацоўнікаў ведамства. У наземных сілах пазбавіліся ад 3077 афіцэраў і вайсковаслужбоўцаў малодшага каманднага саставу, на флоце звольнілі 1126 чалавек, у ВПС - 1949. Чыстка шэрагаў жандармерыі кранула 649 афіцэраў і малодшых камандзіраў, у сістэме Мінюста страцілі працу 1052 супрацоўнікі.

Акрамя таго, урад спыніў паўнамоцтвы васьмі намеснікаў губернатараў і іншых высокапастаўленых чыноўнікаў.

Датэрміновыя прэзідэнцкія выбары прайшлі ў Турцыі 24 чэрвеня, перамогу на іх атрымаў дзейны кіраўнік дзяржавы. Сам Эрдаган назваў вынікі урачыстасцю дэмакратыі і адзначыў, што пераможцамі сталі ўсе грамадзяне 81-мільённай Турцыі.

Эрдаган пайшоў на датэрміновыя выбары пасля ўваходжання ў дзеяння паправак у Канстытуцыю краіны, якія былі адобраны на рэферэндуме вясной 2017 года. Яны накіраваны на ўзмацненне ўлады прэзідэнта, які стаў таксама кіраўніком урада. У Турцыі скасавалі пасаду прэм'ер-міністра, прэзідэнт сам атрымаў права прызначаць высокапастаўленых чыноўнікаў, між іншым віцэ-прэзідэнтаў і міністраў. Паўнамоцтвы прэзідэнта пашырыліся і ў сферы судовай улады.

У канцы чэрвеня газета Daily Sabah са спасылкай на крыніцы ў асяроддзі турэцкага прэзідэнта паведаміла, што Эрдаган мае намер не працягваць рэжым надзвычайнага становішча ў Турцыі, які раней прадаўжаўся кожныя тры месяцы.

Усяго, паводле звестак Reuters, пасля падаўлення спробы перавароту ў Турцыі былі звольненыя амаль 160 тысяч дзяржслужбоўцаў, блізу 50 тысяч чалавек па ўсёй краіне былі арыштаваныя.