Названая прычына руйнавання моста ў Італіі
- 15.08.2018, 15:41
- 25,602
Пракуратура Генуі зрабіла афіцыйную заяву.
Пракурор Генуі Франчэска Коці заявіў, што прычынай руйнавання моста Марандзі была чалавечая памылка.
Пра гэта паведамляе La Repubblica.
«Гэта не няшчасны выпадак, а чалавечая памылка», - заявіў ён пасля заканчэння інспекцыі ў раёне моста.
Па факце здарэння пракуратура адкрыла справу аб злачыннай нядбайнасці і масавым забойстве па неасцярожнасці.
«Мы павінны адказаць на адно пытанне: чаму гэта адбылося? Гэта наша задача і мы будзем рабіць усё неабходнае», - заявіў пракурор.
З ягоных слоў, спачатку следчыя падрабязна вывучаць звесткі аб ходзе рэканструкцыі моста і прафілактычных работ, а таксама прааналізуюць усе падзеі на мосце ў дзень трагедыі. Наступным этапам будуць следчыя дзеянні ў дачыненні да адпаведных інстытутаў і кампаній, прыцягнутых да работ вакол моста.
Частка моста Марандзі даўжынёй каля 100 метраў абрынулася 14 жніўня блізу поўдня. Упала секцыя, якая праходзіла над чыгуначнымі рэйкамі і ракой Пальчэверай.
Ратавальнікі знайшлі целы 38 загінулых у завалах.
Мост Марандзі пабудаваны ў 1960-х гадах на захад ад цэнтра Генуі. Яго даўжыня складае 1182 метры, вышыня - 90 метраў.