Стала вядома пра падрыхтоўку новых санкцый супраць Крамля: яны перашкодзяць «Паўночнай плыні-2»
1- 19.08.2018, 16:11
- 11,835
Новыя санкцыі могуць увесці на працягу некалькіх тыдняў.
Кіраўніцтва ЗША падрыхтавала законапраект аб санкцыях, які можа перашкодзіць завяршыць будаўніцтва газаправода «Паўночная плынь-2» паміж Расеяй і Нямеччынай.
Новыя санкцыі могуць увесці на працягу некалькіх тыдняў, паведаміла газета The Wall Street Journal са спасылкай на дзейных і былых амерыканскіх чыноўнікаў, піша apostrophe.ua.
Абмежаванні плануюць увесці ў дачыненні да кампаній, якія ўдзельнічаюць у будаўніцтве газаправода, ці ж банкаў і іншых фірмаў, якія фінансуюць «Паўночную плынь-2». ЗША асцерагаюцца, што новы газаправод узмоцніць залежнасць Еўропы ад расейскага прыроднага газу. Вашынгтон збіраецца загадзя папярэдзіць Еўразвяз аб увядзенні санкцый.
«Паўночная плынь-2» дублюе ўжо дзейны трубаправод паміж Расеяй і Нямеччынай. Пагадненне аб пракладцы двух новых нітак «Паўночнай плыні» па дне Балтыйскага мора з Расеі ў Нямеччыну было падпісанае ў верасні 2015 года. Магутнасць новага трубаправода складзе 55 мільярдаў кубаметраў газу ў год.