Апазіцыя Малдовы рыхтуе маштабны «начны пратэст» у Дзень незалежнасці

На 26 жніўня ў Кішынёве апазіцыя запланавала маштабную антыўрадавую акцыю пратэсту.

Апазіцыйны Рух нацыянальнага супраціву Малдовы заклікаў грамадзян далучыцца да пратэсту 26 жніўня і застацца на плошчы да 27 жніўня, каб разам адсвяткаваць Дзень незалежнасці.

Пра гэта паведамляе NewsMaker.

На 26 жніўня ў Кішынёве апазіцыя запланавала маштабную антыўрадавую акцыю пратэсту - Народны грамадзянскі сход.

Старшыня партыі «Платформа «Дзеянне і салідарнасць» Андрэй Нэстасе на прэс-канферэнцыі 21 жніўня заклікаў грамадзян браць з сабой намёты, у якіх можна будзе пераначаваць.

Лідары малдаўскай апазіцыі таксама заявілі пра ўдзел у акцыі прадстаўнікоў дыяспары.

«Дзень незалежнасці - свята народа, а не ўзурпатара», - заявіў Андрэй Нэстасе. Ён падкрэсліў, што акцыя носіць мірны і негвалтоўны характар.

Апазіцыя патрабуе ад улады прызнаць сапраўднымі вынікі выбараў мэра Кішынёва і пачаць крымінальны пераслед суддзяў, якія не зацвердзілі мандат абранага мэра Андрэя Нэстасе. Апазіцыя таксама мае намер патрабаваць скасавання змяшанай выбарчай сістэмы.