У Аргентыне спалілі 400 кг какаіну, знойдзенага ў амбасадзе РФ

Партыю какаіну спалілі ў крэматорыі.

У Аргентыне знішчылі партыю какаіну, якая была знойдзена ў будынку амбасады Расеі ў Буэнас-Айрэсе ў лютым.

Наркотыкі былі спаленыя ў крэматорыі, паведамляе выданне El Territorio.

За спаленнем назіралі міністарка бяспекі Аргентыны Патрысія Булрыч і амбасадар Расеі Дзмітрый Феактыстаў.

Міністарка Булрыч назвала гэтую справу "вельмі складанай аперацыяй з высокім узроўнем узаемадзеяння".

Нагадаем, 22 лютага стала вядома аб выяўленні ў школе пры расейскай амбасадзе ў Буэнас-Айрэсе 12 торбаў з 389 кілаграмамі какаіну.

Аб знойдзеных наркотыках распавёў праваахоўнікам расейскі амбасадар Віктар Каранэлі яшчэ ў снежні 2016 года. Валізкі з какаінам пазначылі як дыпламатычную пошту.

Пасля праверкі паліцыянты пацвердзілі, што пасольства выкарыстоўвалі для адпраўкі наркотыкаў. Пасля гэтага ў Буэнас-Айрэсе какаін замянілі на муку і ўсталявалі ў рэчыва GPS-датчыкі. ТОрбы прыбылі ў Расею, дзе праваахоўнікі адсачылі, каму прызначалася буйная партыя наркотыкаў. У Аргентыне і Расеі прайшлі затрыманні ў рамках гэтай справы.

Расейскі МЗС праз свайго афіцыйную прадстаўніцу Марыю Захараву паведаміў, што кантрабандай займаліся "тэхнічныя работнікі амбасады", у якіх не было дыпламатычнага статусу.

Паводле версіі следства, какаін у пасольстве пакінуў яго былы загадчык гаспадаркі Алі Абянаў. Ён быў затрыманы ў Маскве з яшчэ некалькімі фігурантамі справы. Сам Абянаў намагае, што валізкі з наркотыкамі прывёз у амбасаду бізнэсовец Андрэй Кавальчук, які называў сябе супрацоўнікам службы бяспекі дыппрадстаўніцтва Расеі ў Нямеччыне.