У Гішпаніі затрыманы афіцэр расейскай паліцыі

Афіцэр расейскай паліцыі адшукваўся па лініі Інтэрпола за гандаль наркотыкамі.

У Гішпаніі затрыманы афіцэр расейскай паліцыі, якога шукалі па лініі Інтэрпола за гандаль наркотыкамі. Як паведаміў DW у чацвер, 13 верасня, афіцыйны прадстаўнік Грамадзянскай гвардыі (жандармерыі), затрыманне 29-гадовага грамадзяніна Расеі В.Быкава было ажыццёўленае ў курортным мястэчку Платжа Д'Аро, правінцыя Жырона. З ягоных слоў, аперацыя пошуку расейца, абвешчанага на радзіме ў міжнародны вышук, прадаўжалася некалькі месяцаў. Ён хаваўся пад чужым імем з фальшывым украінскім пашпартам.

Устанавіць месцазнаходжанне падазраванага, адзначыў далей прадстаўнік жандармерыі, здолелі з дапамогай расейскіх калегаў, якія інфармавалі гішпанцаў аб частых паездках у іх краіну людзей з атачэння Быкава для сустрэчы з ім. За імі было ўстаноўленае назіранне - сляды прывялі ў Платжа Д'Аро. Пасля гэтага супрацоўнікі Грамадзянскай гвардыі, якія мелі фатаграфіяй з апісаннем знешнасці ўцекача, лёгка пазналі яго і правялі затрыманне.

Гандляр наркотыкамі

На радзіме Быкаў абвінавачваецца ў тым, што ўзначальваў групоўку наркагандляроў. Зрэшты, ён дастаўляў у Расею лацінаамерыканскі какаін. Так, у аэрапорце Пецярбурга мытнымі службамі не так даўно было выяўлена 35 кілаграмаў какаіну, растворанага ў бутэльках партыі рому з Дамініканскай рэспублікі.

Прадстаўнік Грамадзянскай гвардыі растлумачыў таксама, што падазраваны ўцёк у Гішпанію пасля арышту некалькіх сваіх хаўруснікаў. Цяпер ён накіраваны ў распараджэнне Нацыянальнай судовай палаты Гішпаніі (НСПГ), якая павінна разгледзець пытанне аб ягонай экстрадыцыі на радзіму.

Працэс экстрадыцыі ў Гішпаніі займае як правіла ад паўгода да паўтары гадоў. Асобы, якія падлягаюць высылцы, маюць магчымасць аспрэчыць праз суд вышэйшай інстанцыі пастанову НСПГ.

З канца 90-х гадоў мінулага стагоддзя праваахоўныя органы Гішпаніі затрымалі больш за сотню расейцаў, якія спрабавалі ўцячы ў гэтай краіне ад крымінальнага пераследу на радзіме. 28 гішпанскіх сілавікоў удастоеныя расейскіх узнагарод за супрацоўніцтва ў справе затрымання асабліва небяспечных злачынцаў з Расеі.