Bloomberg: Багатыя еўрапейцы пачалі актыўна пакідаць Вялікабрытанію перад Brexit

Brexit павінен адбыцца 29 сакавіка 2019 года.

Забяспечаныя грамадзяне краін Еўрапейскага звязу, якія жывуць у Вялікабрытаніі, актыўна пакідаюць краіну перад Brexit. Пра гэта 17 студзеня паведамляе gordonua.com са спасылкай на Bloomberg.

Энтані Уорд Томас, які валодае кампаніяй, якая дапамагае заможным людзям пераязджаць у іншыя краіны, распавёў агенцтву, што у 2018 годзе ён дапамог з'ехаць з Вялікабрытаніі амаль 300 кліентам, што на 82% больш, чым у 2017 годзе. З ягоных слоў, часцей за ўсё людзі пераязджаюць у Парыж (Францыя), Брусэль (Бэльгія), Цюрых, Жэневу (Швайцарыя), паўднёвыя рэгіёны Францыі і некаторыя гішпанскія гарады.

Прадпрымальнік распавёў, што большасць яго кліентаў з'яўляюцца заможнымі еўрапейцамі, капітал якіх перавышае £5 млн ($6,4 млн). Яны пакідаюць Вялікабрытанію разам з сем'ямі. Часцей за ўсё іх цікавяць месцы з больш цёплым кліматам і краіны са стабільнай палітычнай сітуацыяй.

«Людзей не так хвалюе Brexit, як агульная нестабільнасць сітуацыі ў дзяржаве. Людзі пакідаюць карабель, таму што сам карабель ідзе да дна», - сказаў Томас.

На думку прадпрымальніка, яго кліенты перажываюць, што адмова брытанскага парламента падтрымліваць пагадненне з ЕЗ аб умовах выхаду краіны з арганізацыі, пацягне за сабой павелічэнне плыні мігрантаў. Таксама іх трывожыць магчымае прызначэнне на пасаду прэм'ер-міністра лідара лейбарыстаў Джэрэмі Корбіна, які выступае за змяненне сістэмы падаткаабкладання.

15 студзеня брытанскія парламентарыі не падтрымалі прадстаўлены ўрадам тэкст пагаднення з ЕЗ аб умовах выхаду. Прэм'ер-міністарка Вялікабрытаніі Тэрэза Мэй павінна 21 студзеня падаць «план Б» паводле Brexit, які павінен адбыцца 29 сакавіка 2019 года.