Запісаная ў «дармаеды» шматдзетная маці: Я дагэтуль у шоку

Як Юлія Ганісеўская дамаглася выключэння са спісу «дармаедаў».

Маці чацвярых дзяцей з Гомеля Юлія Ганісеўская атрымала афіцыйнае апавяшчэнне аб уключэнні яе ў базу «дармаедаў». «Ліст шчасця» яна атрымала з рук настаўнікаў сваіх дзяцей.

Гісторыя абляцела ўсе беларускія СМІ, выклікала бурную рэакцыю сярод карыстальнікаў сацыяльных сетак. Сайт Сharter97.org звязаўся з Юліяй Ганісеўскай і ўжо ведаў усе падрабязнасці гучнага інцыдэнту.

- Якой была ваша рэакцыя, калі да вас прыйшлі настаўнікі з «лістамі шчасця»?

- Я была вельмі здзіўленая. На вуліцы была завіруха, вецер, холадна. Я вельмі здзівілася, што да мяне прыйшлі настаўнікі, бо цяпер вакацыі. У настаўнікаў былі разгубленыя твары, ім было вельмі нязручна ад усёй гэтай сітуацыі. Здзівіла, што іх прымусілі выконваць абавязкі паштальёнаў. Шчыра кажучы, я дагэтуль у шоку.

- Дэкрэт аб «дармаедах» працуе не першы год. Ці закранула вас папярэдняя версія дэкрэта?

- Я не трапляла пад папярэднюю версію дэкрэта. Восем гадоў таму я нарадзіла двайнятак і стала шматдзетнай маці. Не мела ніякага дачынення да гэтага дэкрэта.

Таму паўтаруся, што я была ў шоку, калі да мяне прыйшлі настаўнікі з гэтай паперай.

Па-другое, я як шматдзетная маці атрымліваю дапамогу ад дзяржавы. Гэта складаная працэдура, якая патрабуе сталага абнаўлення звестак: прыносім дакументы, сведчанні аб нараджэнні дзяцей, розныя даведкі. Абсалютна ўсюды ёсць звесткі, што мы - шматдзетная сям'я, таму нават настаўнікі былі ў шоку, што я атрымала гэта паведамленне.

Хочацца яшчэ закрануць стаўленне грамадства да шматдзетных сем'яў. У людзей складаецца меркаванне, што шматдзетныя сем'і - безадказныя людзі, якія без разбору плодзяцца, нейкія няшчасныя. Гэта жудасны стэрэатып.

Мы ніякія не маргіналы, мы - не алкаголікі, мы - самая звычайная сям'я. Я б з вялікім задавальненнем пайшла працаваць на дзяржаўную працу, але я проста неканкурэнтаздольная.

Як толькі даведваюцца, што ў цябе чацвёра дзяцей - цябе ніхто не хоча браць. Вакансія адкрытая, тэлефануеш, размаўляеш, гаворыш, што ў цябе чацвёра дзяцей - усё. З табой ніхто не хоча размаўляць. У мяне вельмі шмат знаёмых шматдзетных мам, якія хочуць уладкавацца нават прыбіральшчыцай. Як толькі даведваюцца, што ты шматдзетная - адразу ж кажуць, што «вы нам не падыходзіце». Кажуць адкрытым тэкстам.

Добра, што мой муж нядрэнна зарабляе. Таксама я атрымліваю пенсію праз страту карміцеля на дзяцей. Мая пенсія ідзе на камунальныя паслугі, а заробак мужа на прадукты, рамонт жылля, розныя выдаткі. Звычайная беларуская сям'я. Калі можна падпрацаваць - я падпрацоўваю. Няма такога, што я плюю ў столь і гультайнічаю. Так, афіцыйна я не працую, але гэта не азначае, што я дармаед.

- Якія будуць вашы далейшыя дзеянні ў гэтай сітуацыі?

- Сёння мне патэлефанавалі, што ніякія дадатковыя дакументы мне прыносіць не трэба, што мяне ўнеслі ў базу шматдзетных маці. Я вельмі здзіўленая, што дагэтуль не знаходзілася ў гэтай базе. І на тым дзякуй, што хоць цяпер я стала шматдзетнай.

Хацелася б таксама заявіць, што ў гэтай сітуацыі ніяк не вінаватыя настаўнікі, ніяк не вінаваты дырэктар школы. Гэта проста цудоўныя людзі. У нас добрая школа і выкладчыкі. Вельмі шкада, што на іх апошнім часам вылілася столькі негатыву.