СМІ апавялі пра праблемы са здароўем у Лукашэнкі

Журналістам вядома толькі пра частку з іх.

На нядаўняй сустрэчы з украінскімі журналістамі Лукашэнка заявіў, што прадоўжыць «працаваць», пакуль людзі яму давяраюць і «пакуль ёсць здароўе».

Аднойчы Лукашэнка нават тлумачыў пытанне здароўя больш падрабязна:

«Калі я не змагу працаваць “прэзідэнтам” і буду пры сваім розуме, разумееце, я нямоглы чалавек, але галава цяміць, я пайду ў адстаўку сам».

UDF.BY апавёў, што вядома пра праблемы са здароўем кіраўніка Беларусі на гэты момант.

З усяго відаць, журналістам вядома толькі пра частку з іх.

Мала хто ведае, што ў дыктатара ёсць ці, прынамсі, былі, праблемы са зрокам. У 2012–2013 гадах Лукашэнка некалькі разоў з'яўляўся ў кадры з акулярамі. Верагодна, гэтыя моманты не павінны былі трапіць на камеру – акуляры проста забываліся ў час выбраць.

Мінімум дзве сур'ёзныя праблемы былі ў Лукашэнкі з каленямі. Верагодна, яшчэ ў 90-я Лукашэнка, які любіў гуляць у футбол, сур'ёзна траўмаваўся. «Мне паўкалена выразалі, дык скакаць на полі было ўжо цяжка», – так тлумачыў кіраўнік краіны свой прыход у хакей.

Але і ў гэтым відзе спорту Лукашэнка атрымаў некалькі сур'ёзных траўмаў. Адна з іх зноў тычылася каленнага сустава. Пра праведзеную аперацыю ў эфіры тэлеканалаў паведаміла прэс-сакратарка кіраўніка Наталля Эйсмант. Але засталося загадкай, ці былі праблемы з той жа нагой, якую дыктатар пашкодзіў у мінулым.

Таксама праз захапленне хакеем Лукашэнку цягам жыцця некалькі разоў разбівалі твар.

«Часта прыводжу прыклад, калі вы ўважліва прыгледзецеся, у мяне адно вока адрозніваецца ад іншага. Чатыры разы мне шылі твар у лякарні. А што швоў не відаць – добра працуюць лекары! Апошні раз так лоб рассеклі клюшкай – шэсць швоў наклалі», – запэўніваў дыктатар.

Сведкай наступстваў аднаго такога выпадку была Эйсмант:

«Каб не ўбачылі траўму, здымаць трэба было толькі з пэўнага ракурсу. А трэба было выступіць на ўрачыстым мерапрыемстве ў Палацы Рэспублікі. Як мы ні стараліся, схаваць гэта на той момант правільна не атрымалася. Нас выратавала тое, што гледачы былі далёка».

30 ліпеня 2018 года прэс-сакратарка Лукашэнкі Наталля Эйсмант пракаментавала інфармацыю пра інсульт у кіраўніка Беларусі.

Пра меркаваную хваробу Лукашэнкі паведамілі расейскія Telegram-каналы, а потым украінскі сайт Dsnews.ua. У публікацыі апошняга адзначалася, што Лукашэнка з 28 ліпеня не з'яўляўся на публічных мерапрыемствах. А 26 ліпеня ён павінен быў прыехаць у Гомель, аднак візіт не адбыўся.

Учора выданне «Салідарнасць» звярнула ўвагу на дзіўныя паводзіны Лукашэнкі падчас спуску па трапе самалёта ў Ерэване. Склалася ўражанне, што дыктатар рабіў гэта з цяжкасцю, хапаючыся за поручні.