Амбасадара Ізраіля выклікалі ў МЗС Беларусі
- 10.10.2019, 16:21
- 12,908
Афіцыйны Менск абвінаваціў Ізраіль у «дыскрэдытацыі бязвізавага рэжыму».
Пра гэта паведаміла Міністэрства замежных спраў Беларусі, піша tut.by.
Паводле інфармацыі МЗС, 7 кастрычніка ў аэрапорце Тэль-Авіва ізраільскія міграцыйныя ўлады адправілі дадому адразу 11 беларусаў.
- Мы ішлі на падпісанне Пагаднення аб бязвізавых паездках з Ізраілем, каб палегчыць і спрасціць узаемныя кантакты грамадзян нашых краін, - напісана на старонцы МЗС. - Аднак ізраільскі бок сваімі дзеяннямі дыскрэдытуе ўвесь гэты працэс. Практыка адмоваў ва ўездзе беларускім грамадзянам пачынае набываць масавы характар і для нас з'яўляецца прынцыпова непрымальнай. Мы настроены на прадаўжэнне дыялогу і пошук варыянтаў развязання праблемы пры абавязковым уліку інтарэсаў адзін аднаго.
Сёння ў МЗС быў выкліканы Пасол Ізраіля ў Беларусі, якому быў заяўлены пратэст. Пэўнае разуменне, паводле інфармацыі МЗС, было дасягнутае.